މި މަހުގެ 23 އިން 25 އަށް ކުރިއަށް ދިޔަ މި ސެޝަންގައި ރާއްޖެއިން ގެންގުޅޭ ވިޔަފާރީގެ ސިޔާސަތުތަކަށް ދުނިޔޭގެ ބޮޑެތި ގައުމުތަކުން ތައުރީފުކުރި އެވެ. އަދި ރާއްޖޭގެ އިގްތިސާދު ސިންދަފާތުކުރުމަށް ކުރަމުންދާ މަސައްކަތްތަކަށް މެންބަރު ގައުމުތަކުން ވަނީ އެކަށީގެންވާ ތަރުހީބެއް ދީފައައިވާކަމަށް އިކޮނޮމިކް މިނިސްޓްރީން ބުންޏެވެ.
އިކޮނޮމިކް މިނިސްޓްރީން ބުނީ މި ސެޝަންގައި ބައިވެރިވި ޓީމުން ވަނީ މެންބަރު ގައުމުތަކުގެ ސުވާލުތަކަށް ޖަވާބުދީފައި ކަމަށެވެ. އަދި ބައިލެޓަރަލް ޓްރޭޑިން ޕާޓްނަރުންނާއި ބައިނަލްއަގުވާމީ ޖަމިއްޔާތަކުން ރާއްޖެއަށް ތައުރީފުކުރި ކަމަށް އެ މިނިސްޓްރީން ބުންޏެވެ.
ރާއްޖޭގެ މާލީ އަދި އިގްތިސާދީ ހާލަތު ރަނގަޅުކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރޭގައި ފައިސާ ޗާޕުކުރުން ހުއްޓާލުމާއި، ދައުލަތުގެ ހަރަދުތައް ކުޑަކުރުމާއި، ޑޮލަރު މާރުކުރުމުގެ ގަވާއިދަށް ގެނައި އިސްލާހުތައް ހިމެނެ އެވެ.
