ސަރުކާރުން އިތުރަށް ހުށަހަޅާފައިވާ 5.1 ބިލިއަން ރުފިޔާގެ ސަޕްލިމެންޓްރީ ބަޖެޓާ އެކު މިއަހަރުގެ ޖުމުލަ ބަޖެޓު 55 ބިލިއަން ރުފިޔާއަށް އަރާނެ ކަމަށް އެމްއެމްއޭ އިން ބުންޏެވެ. އަދި މިކަމުގެ ސަބަބުން ބަޖެޓު ޑެފިސިޓް ބޮޑުވެ، 18 ބިލިއަން ރުފިޔާއަށް އަރާނެ ކަމަށް ވެސް ބުނެއެވެ.
އެމްއެމްއޭ އިން މަޖިލީހަށް ފޮނުވި ލަފާގައި ބުނެފައިވަނީ ބޭރުގެ ފަރާތްތަކުން އިތުރަށް ހޯދަން ރާވާފައިވާ 1.5 ބިލިއަން ރުފިޔާ ހޯދުމަށް ހިރާސްތަކެއް ހުރި ކަމަށެވެ. އަދި ޑޮމެސްޓިކް މާކެޓުން ހޯދަން ރާވާފައިވާ 2.9 ބިލިއަން ރުފިޔާ ހޯދުމަށް ވެސް ދަތިތަކެއް ހުރި ކަމަށް ބުނެފައިވެ އެވެ.
އެމްއެމްއޭ އިން ބުނީ ބަޖެޓު ޑެފިސިޓް ކުޑަކުރުމަށް ރިކަރަންޓް ހަރަދުތައް ކުޑަކުރަން ޖެހޭ ކަމަށެވެ. އަދި ކެޕިޓަލް ހަރަދުތައް ކުރުމުގައި ކޮންމެހެން ހިންގަން ޖެހޭ މަޝްރޫއުތަކަށް އިސްކަން ދިނުމަށް ވެސް ލަފާދީފައިވެ އެވެ.
ބޭރުގެ ކްރެޑިޓް ރޭޓިން އޭޖެންސީތަކުން ރާއްޖޭގެ ރޭޓިން ދަށްކޮށްފައިވާތީ، މިއަހަރު ބަޖެޓުގެ ހަރަދުތައް ހަމަޖައްސަން ޑޮމެސްޓިކް މާކެޓަށް ވަރަށް ބޮޑަށް ބަރޯސާވާން ޖެހިފައިވާ ކަމަށް އެމްއެމްއޭ އިން ބުންޏެވެ.
