އެއީ ރީޖަނަލް އެއަރޕޯޓްސް ކޮމްޕެނީ (އާރުއޭސީއެލް) އާއި އެމްއައިޓީޑީސީ އަދި އައްޑޫ އެއަރޕޯޓް ކުންފުނި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ އަހަރީ މާލީ ރިވިއުގައި ބުނެފައިވަނީ، އެ ތިން ކުންފުނީގެ މާލީ ހިސާބުތައް އޮޑިޓް ކުރީ ކްރޯ މޯލްޑިވްސް އިން ކަމަށެވެ. އަދި އޮޑިޓް ކުރުމަށް އެންމެ ބޮޑު ގޮންޖެހުމަކަށް ވެފައިވަނީ ކުންފުނިތަކުން މާލީ ހިސާބުތައް ނުދޭތީ ކަމަށް އޮޑިޓަރުން ފާހަގަކޮށްފައިވެ އެވެ.
މީގެ އިތުރުން، މާލީ ހިސާބުތަކުގައި މައްސަލަ ހުރިކަން ފާހަގަކުރެވޭ އިތުރު ހަ ކުންފުންޏެއް އެބަހުއްޓެވެ. އޭގެ ތެރޭގައި ފަހި ދިރިއުޅުން ކޯޕަރޭޝަން، ފެނަކަ، އެމްއެމްޕީއާރުސީ، އެމްޓީޑީސީ، އާރުޑީސީ އަދި ސްޓެލްކޯ ހިމެނެ އެވެ.
ވެމްކޯ އާއި ޕީއެސްއެމްގެ މާލީ ހިސާބުތަކުގައި ގިނަ މައްސަލަތަކެއް ހުރުމާ ގުޅިގެން އެ ދެ ކުންފުންޏަށް އޮޑިޓް އޮޕީނިއަން ނުދޭން ވަނީ ނިންމައިފަ އެވެ.
މިދިޔަ އަހަރު ސަރުކާރު ހިއްސާވާ 30 ކުންފުނީގެ ތެރެއިން 14 ކުންފުންޏަށް ޖުމުލަ 6.4 ބިލިއަން ރުފިޔާގެ ފައިދާ ވެފައިވާއިރު، އެހެން ކުންފުނިތަކަށް ވަނީ ގެއްލުން ވެފަ އެވެ. ނަމަވެސް މިދިޔަ އަހަރު އެ ކުންފުނިތަކަށް އާމްދަނީގެ ގޮތުގައި 53 ބިލިއަން ރުފިޔާ ލިބިފައިވެ އެވެ.
