ބަޖެޓު ހުށަހަޅަމުން މިނިސްޓަރު ވިދާޅުވީ އަންނަ އަހަރު ރަހުމަތްތެރި ގައުމުތަކުން ޖުމުލަ 2.25 ބިލިއަން ރުފިޔާ ލިބޭނެ ކަމަށް ލަފާކުރާ ކަމަށެވެ. އޭގެ ތެރެއިން 1.6 ބިލިއަން ރުފިޔާ ލިބޭނީ އިންޑިއާއިން ކަމަށް ވެސް އެ މިނިސްޓްރީން ބުނެއެވެ.
އިންޑިއާއިން ލިބޭނެ ކަމަށް ލަފާކުރާ ފައިސާގެ ތެރޭގައި ތިލަމާލެ ބްރިޖު އެޅުމަށް ދޭނެ ކަމަށް ބުނެފައިވާ 105 މިލިއަން ޑޮލަރު ހިމެނެއެވެ. އަދި ޗައިނާއިން ލިބޭނެ ކަމަށް ލަފާކޮށްފައި ވަނީ 502 މިލިއަން ރުފިޔާ އެވެ. އެއީ ޖުމުލަ ހިލޭ އެހީގެ 22 ޕަސެންޓެވެ.
އިންޑިއާ އާއި ޗައިނާގެ އިތުރުން ޖަޕާން، ޕާކިސްތާން، ސައުދީ އަރަބިއްޔާ، ނެދަލޭންޑްސް، އިޓަލީ އަދި ޔޫއޭއީން ވެސް ހިލޭ އެހީ ލިބޭނެ ކަމަށް ބަޖެޓުގައި ލަފާކޮށްފައިވެ އެވެ. އަދި އެކި ޖަމިއްޔާ ޖަމާއަތްތަކުން 336 މިލިއަން ރުފިޔާ ލިބޭނެ ކަމަށް ވެސް ބަޖެޓުގައި ފާހަގަކޮށްފައިވެ އެވެ.
މި އަހަރު ވެސް އިންޑިއާއިން ވަނީ ރާއްޖެއަށް ގިނަ އެހީތަކެއް ފޯރުކޮށްދީފަ އެވެ. އެގޮތުން ސެޕްޓެމްބަރު މަހު ދައްކަން ޖެހުނު 50 މިލިއަން ޑޮލަރުގެ ލޯނު ރޯލްއޯވަރ ކޮށްދިނުމާއި، 400 މިލިއަން ޑޮލަރާއި 30 ބިލިއަން ރުޕީސްގެ ސްވޮޕް އެގްރީމެންޓެއް ހެދުން ހިމެނެ އެވެ.
ފިނޭންސް މިނިސްޓްރީން ބުނީ އަންނަ އަހަރަށް ލަފާކުރާ ބަޖެޓުގައި ހިލޭ އެހީގެ ގޮތުގައި ލިބޭނެ ކަމަށް ލަފާކޮށްފައިވާ އަދަދުތަކަކީ އެ ގައުމުތަކާ އެކު މިހާރު ކުރެވިފައިވާ މަޝްވަރާތަކުގެ މައްޗަށް ބިނާކޮށް އަންދާޒާކޮށްފައިވާ އަދަދުތަކެއް ކަމަށެވެ.
