ބީއެމްއެލްއިން ބުނީ މި އޭޓީއެމް ސެންޓަރު މެދުވެރިކޮށް ދުވާލެއްގެ މައްޗަށް 24 ގަޑިއިރު އަސާސީ ބޭންކިން ހިދުމަތްތައް ލިބޭނެ ކަމަށެވެ. މީގެ ތެރޭގައި ފައިސާ ނެގުމާއި، ޖަމާކުރުމާއި އަދި ފައިސާ ޓްރާންސްފާ ކުރުން ހިމެނެ އެވެ.
ހިމަންދޫގައި ހުޅުވި އޭޓީއެމް ސެންޓަރުގެ އިތުރުން މި ހަފުތާގެ ތެރޭގައި އެ އަތޮޅުގެ ފެރިދޫ އާއި ބޮޑުފޮޅުދޫގައި ވެސް އޭޓީއެމް ސެންޓަރު ހުޅުވައިފި އެވެ. މިއާއެކު އއ. އަތޮޅުގައި ބީއެމްއެލްގެ ޖުމުލަ ހަތް އޭޓީއެމް ސެންޓަރު ގާއިމުކޮށްފައިވާ ކަމަށް އެ ބޭންކުން ބުންޏެވެ.
ބީއެމްއެލްއިން ބުނީ މުޅި ރާއްޖެ ހިމެނޭ ބޭންކިން ވިއުގައެއްގެ ތެރެއިން 20 އަތޮޅުގައި 39 ބްރާންޗް، 92 ސެލްފްސާވިސް ބޭންކިން ސެންޓަރު އަދި 148 އޭޓީއެމް ގާއިމުކޮށްފައިވާ ކަމަށެވެ. މީގެ އިތުރުން އޭޖެންޓު ބޭންކިން ހިދުމަތާއި ޒަމާނީ އޮންލައިން ބޭންކިން ހިދުމަތް ވެސް ފޯރުކޮށްދެމުން ގެންދާ ކަމަށް އެ ބޭންކުން ބުންޏެވެ.
