ޝަހީބާ ނިޔާވީ ރޭގެ ވަގުތެއްގައެވެ. ނިޔާވިއިރު އުމުރުފުޅަކީ 77 އަހަރެވެ.
ދިވެހި ދައުލަތަށް 44 އަހަރަށްވުރެ ގިނަ ދުވަހު ހިދުމަތްކުރައްވައި، ޤައުމީ އިނާމު ހާސިލުލްކުރައްވާފައިވާ ޝަހީބާ މުހައްމަދު ނިޔާވުމުގެ ރައީސް ޑރ. މުހައްމަދު މުއިއްޒުވަނީ އެ މަރުޙޫމާގެ ޢާއިލާއަށް ތަޢުޒިޔާ ދަންނަވާފައެވެ.
ޝަހީބާ މުހައްމަދު، ދައުލަތުގެ ހިދުމަތް ފެށްޓެވީ، 17 ޖޫން 1962 ގައި ޕޯސްޓް އޮފީސްގެ ވަގުތީ ކާތިބާއެއްގެ ވަޒީފާއިންނެވެ. 44 އަހަރަށްވުރެ ދިގު މުއްދަތެއްގައި ހިދުމަތް ކުރެއްވުމަށްފަހު، ދައުލަތުގެ ހިދުމަތުން ވަކިވެވަޑައިގަތީ، 27 ޑިސެންބަރު 2009 ގައެވެ.
ހިދުމަތުގައި ހޭދަކުރެއްވި ދިގު މުއްދަތުގެ ތެރޭގައި، ދައުލަތުގެ ތަފާތު ދާއިރާތަކުގައި ޝަހީބާ މުހައްމަދު ވަނީ ހިދުމަތް ކުރައްވައިފައެވެ.
ޝަހިބާ ވަނީ ރައްޔިތުން މަޖިލީހުގައިވެސް ގިނަ ދުވަސްތަކެއް ވަންދެން މަސައްކަތް ކުރައްވާފައެވެ. 15 ނޮވެންބަރު 1979 ގައި ޝަހީބާ ރައްޔިތުންގެ މަޖިލީހުގެ އިދާރީ ބަޔާއި ގުޅިވަޑައިގެން އެތަނުގައި 9 އަހަރަށްވުރެ ދިގު މުއްދަތެއްގައި ހިދުމަތް ކުރެއްވިއެވެ. އޭގެތެރޭގައި މަޖިލީހުގެ ސެކްރެޓެރީ ކަމާއި، ސީނިއަރ ސެކްރެޓެރީ ކަމާއި، އޮފީސް އެސިސްޓެންޓް ކަމުގެ މަގާމު އަދާކުރެއްވިއެވެ. ރައްޔިތުންގެ މަޖިލީހުގައި ޝަހީބާ ކުރެއްވި މައިގަނޑު މަސައްކަތްތަކުގެ ތެރޭގައި، މަޖިލީހުގެ ޖަލްސާތައް ނިމުމުން، މަޖިލީހުން ނިންމަވާ މައްސަލަތަކުގެ ރިޕޯޓް ލިޔުއްވައި، ރައީސުލްޖުމްހޫރިއްޔާގެ އޮފީހަށް ފޮނުއްވުން ހިމެނެއެވެ.
