ދައުލަތުގެ މީޑިއާ މެދުވެރިކުރައްވައި ވާހަކަ ދައްކަވަމުން ސާއިދު ވިދާޅުވީ ކުރިން ބޮޑެތި ހޭދަކުރަންޖެހޭ މަޝްރޫއުތަކަށް ބަޖެޓުގައި ކުދިކުދި އަދަދުތަކުން ފައިސާ ހިމެނުމުގެ ސަބަބުން މަޝްރޫއުތައް މަޑުޖެހި ލަސްވެފައިވާ ކަމަށެވެ. އެހެންކަމުން، އަންނަ އަހަރުގެ ބަޖެޓުގައި އެންމެ އިސްކަންދޭންވީ މަޝްރޫއުތައް ކަނޑައަޅައި، އެ މަޝްރޫއުތަކަށް އެކަށީގެންވާ ފައިސާ ހިމަނާފައިވާނެ ކަމަށް އޭނާ ވިދާޅުވި އެވެ.
އަންނަ އަހަރުގެ ބަޖެޓުގައި ޕީއެސްއައިޕީގެ ތެރެއިން 1.5 ބިލިއަން ރުފިޔާއާ ގާތްކުރާ މިންވަރެއް ހައުސިން މަޝްރޫއުތަކަށް ހާއްސަކޮށްފައިވާ ކަމަށް ސާއިދު ބުންޏެވެ. މީގެ އިތުރުން ހޮސްޕިޓަލުތަކާއި ސްކޫލުތައް އިމާރާތްކުރުން ފަދަ ކަންކަމަށްވެސް ބަޖެޓުގައި ފައިސާ ހިމަނާފައިވާނެ ކަމަށް އޭނާ ވިދާޅުވި އެވެ.
ސާއިދު އިތުރަށް ވިދާޅުވީ މި ބަޖެޓު ތަންފީޒުކުރުމުގެ ތެރެއިން ރައީސް މުހައްމަދު މުއިއްޒު ވައުދުވެވަޑައިގެންފައިވާ މައިގަނޑު ހުރިހާ މަސައްކަތްތަކެއް ފަށައިގަތުމަށް ބޭނުންވާ ފައިސާގެ އަދަދުތައް ބަޖެޓުގައި ހިމެނިފައިވާނެ ކަމަށެވެ. އަދި މި ބަޖެޓު ތަންފީޒުކުރުމުގެ ތެރެއިން ރައީސްގެ އައު ޕީއެސްއައިޕީ ޕައިޕްލައިން އުފަންވެގެން އަންނާނެ ކަމަށްވެސް އޭނާ ވިދާޅުވި އެވެ
