ބިލާލް އަކީ 2015 ވަނަ އަހަރު ހުސައިން ރަޒީން (ރަބަރޭ) މަރާލި މައްސަލައިގައި ވެސް ތުހުމަތުކުރެވުނު މީހެކެވެ.
ބިލާލް ހައްޔަރުކުރީ މިދިޔަ މަހުގެ 24 ވަނަ ދުވަހުއެވެ. އޭނާ ހައްޔަރުކުރި ސަބަބަކީ އަރުގަމް ބޭ ސަރަހައްދުގައި ހުންނަ އިޒްރޭލުގެ ބަޔަކު ހިންގާ "ޗަބާދް ހައުސް" އަށް ހަމަލާދޭން އުޅުނު ކަމަށް ކުރިން ބުނެފައިވީ ނަމަވެސް، އެންމެ ފަހުގެ ރިޕޯޓުތައް ބުނާގޮތުން އޭނާ ހައްޔަރުކުރީ "މާލޭގެ ގޭންގު ލީޑަރަކަށް ބަޑިޖަހައި މަރާލަން" އުޅުނު ކަމުގެ ތުހުމަތުގައެވެ.
ލަންކާ ފުލުހުން ބުނާ ގޮތުގައި މަރާލަން އުޅުނު ކަމަށް ބުނާ މީހާ ފުލުހުންނަށް ހާޒިރުކޮށް އެކަން އަންގާފައިވެއެވެ. އަދި އޭނާ މަރާލަން ރޭވި ކަމާއި، އެކަމާ ގުޅޭ ގޮތުން ފޯނުން ކޮށްފައިވާ މެސެޖުތަކާއި ފައިސާގެ މުއާމަލާތްތަކާ ބެހޭ މައުލޫމާތު ވެސް ދީފައިވާ ކަމަށް އެނގެއެވެ.
ބިލާލަކީ 2015 ވަނަ އަހަރު ރަބަރޭ މަރާލި މައްސަލައިގައި ވެސް ހައްޔަރުކުރެވުނު މީހެކެވެ. އެ މައްސަލައިގައި ރާއްޖޭގައި ކުރި ދައުވާގައި ބުނެފައިވަނީ ބިލާލް އެކަން ކުރީ ރާއްޖޭގައި ތިބި ބަޔަކު ފައިސާ ދިނުމުން ކަމަށެވެ. ލަންކާ ފުލުހުން ބުނެފައިވާ ގޮތުގައި ރަބަރޭ މަރާލީ 140 މިލިއަން ލަންކާ ރުޕީސްއަށެވެ.
ދިވެއްސަކު ހައްޔަރުކޮށްފައިވާ ކަން ލަންގާ ފުލުހުން ވެސް ޔަގީންކޮށްދެއެވެ. ނަމަވެސް އެ މައްސަލައިގެ ތަފްސީލެއް ނުދެއެވެ.
