ބައިޑެން އެގޮތަށް ވިދާޅުވީ ޕްރޮގްރެސިވް ގްރޫޕް، ވޯޓޯ ލެޓިނޯއިން ކުރި ވީޑިއޯ ކޯލެއްގަ އެވެ. ބޭރުގެ މީޑިއާތަކުން ރިޕޯޓުކޮށްފައި ވާގޮތުގައި އެއީ، ޓްރަމްޕްގެ ކެމްޕޭނު ރެލީއެއްގައި ކެރީބިއަންގެ ޖަޒީރާ ރަށް، ޕުއެޓޯ ރީކޯ އަކީ ކުނީގެ ރަށެއް ކަމަށް ބުނެ ކޮމީޑިއަން ޓޯނީ ހިންޗްކްލިފް ދެއްކި ވާހަކައަކާ ގުޅިގެން ބައިޑެން ދެއްކެވި ވާހަކަތަކެކެވެ.
މިދިޔަ ޖޫން މަހު ބޭއްވި އެމެރިކާގެ ރިޔާސީ އިންތިހާބުގެ ބަހުސަށްފަހު އުމުރުން 81 އަހަރުގެ ބައިޑަން ވަނީ ރިޔާސީ އިންތިޚާބުން ވަކިވެވަޑަގަންނަވާކަން އިއުލާނުކުރައްވާފައެވެ. އޭގެކުރިން ވެރިކަން ކުރެއްވުމުގެ ގާބިލުކަން ބައިޑަންގެ ކިބައިގައި ނެތް ކަމަށް ބުނެ އަމިއްލަ ޕާޓީގެ މެމްބަރުން ވެސް ވަނީ ފާޑުކިޔާފަ އެވެ.
ރިޔާސީ ރޭހުން ވަކިވެވަޑައިގަތުމަށްފަހު، އޭނާގެ ބަދަލުގައި އިންތިޚާބުގައި ވާދަކުރައްވާނީ ނައިބު ރައީސް ކަމަލާ ހެރިސް ކަމަށް އިއުލާނުކުރައްވާފައިވެ އެވެ.
ރިޕަބްލިކަން ޕާޓީން ވަނީ ކެމްޕޭންގެ މުހިންމު ފަހު ހަފުތާގައި ޑިމޮކްރެޓުންނާ ދެކޮޅަށް ދިން ހަމަލާއެއްގެ ގޮތުގައި ބައިޑަންގެ އެ ވާހަކަފުޅު ބޭނުންކޮށްފަ އެވެ.
އެމެރިކާގެ ވިސްކޮންސިންގެ ގްރީން ބޭގައި ބޭއްވި އިންތިހާބީ ރެލީއަކަށް ޓްރަމްޕް އިއްޔެ ވަޑައިގަތީ އޭނާއަށް ހާއްސަކޮށް ތައްޔާރުކޮށްފައިވާ ކުނިއުކާ ލޮރީއެއްގެ ކުރިމަތީ ގޮނޑީގައި އިށީނދެވަޑައިގެންނެވެ. އޭނާ އިންނެވީ ކުނިއުކާ މުވައްޒަފުން ލާ ކަހަލަ އޮރެންޖް ކުލައިގެ ޖެކެޓެއްވެސް ތުރުކުރައްވައިގެންނެވެ.
ޓްރަމްޕް ވެސް ވަނީ ޑިމޮކްރެޓިކް ޕާޓީގެ ރިޔާސީ ކެންޑިޑޭޓް އަދި ނައިބް ރައީސް ކަމަލާ ހެރިސްއަށް ވެސް ވަރަށް ބޮޑަށް ފާޑުވިދާޅުވެފަ އެވެ.
ޑިމޮކްރެޓިކް ޕާޓީން ވާދަކުރައްވާ ކެންޑިޑޭޓް ނާއިބު ރައީސް ކަމަލަ ހެރިސް އާއި އިދިކޮޅު ރިބަޕްލިކަން ޕާޓީން ވާދަކުރައްވާ ޑޮނަލްޑް ޓްރަމްޕްގެ މެދުގައި އިންތިހާބު ކާމިޔާބު ކުރައްވާނީ ކޮން ބޭފުޅެއްތޯ ނަގާ ޕޯލްތައް ވެސް އިތުރުވެފައިވާއިރު، ގިނަ ޕޯލުތަކުގައި ދެ ބޭފުޅުން ވެސް އުޅުއްވަނީ ދާދި އެއް ވަރެއްގަ އެވެ.
ހިޔާލު ހޯދުމުގެ ބައެއް ވޯޓުތައް ދައްކާ ގޮތުން ޓްރަމްޕަށް ވުރެ ކަމަލާއަށް އޮތް ތާއީދު ބޮޑެވެ. ނަމަވެސް، ކަމަލާގެ ކިބާގައި ޓްރަޕްގެ ހުރި ވަރުގެ ސިޔާސީ ގާބިލުކަން ނެތުމަކީ ފަހަރެއްގައި ކަމަލާއަށް ވޯޓުން ތަފާތު ފެނިވަޑައިގެންފާނެ ކަމެކެވެ.
