މި ކަން އެންސްޕާއިން އިއުލާނު ކުރީ ގިނަ ބައެއްގެ ކަންބޮޑުވުން ފާޅުކުރަމުންދާ ދަނޑިވަޅެއްގަ އެވެ.
އެ ކުންފުނިން ނެރުނު ބަޔާނެއްގައި ބުނެފައިވަނީ އަމިއްލަ އިންޝުއަރެންސްގެ ކަވަރޭޖު ނުވަތަ ހިދުމަތް ނުލިބޭ ހާލަތެއްގައި ނަމަ، އެ ފަރާތަކަށް އާސަންދަ ސްކީމުން މިހާރު ވެސް ހިދުމަތް ލިބެމުންދާ ގޮތަށް ބޭސްފަރުވާގެ ހިދުމަތް ލިބިގެންދާނެ ކަމަށެވެ. މިއީ އަމިއްލަ އިންޝުއަރެންސް ކުންފުނިތަކުން ކޭޝްލެސް ޕޭމަންޓު ހުއްޓާލުމުގެ ސަބަބުން ކުރިމަތިވެދާނެ ދަތިތަކަށް ހައްލެއް ހޯދުމަށް އެޅި ފިޔަވަޅެކެވެ.
އާސަންދައިގެ އާ އުސޫލުގެ ދަށުން، އަމިއްލަ އިންޝުއަރެންސް ކަވަރޭޖެއް އޮތްނަމަ އާސަންދަ ލިބޭނީ އެ ކަވަރޭޖެއް ހުސްވުމުން ކަމަށް ކުރިން އޮތް ނަމަވެސް، މިހާރު އެ އުސޫލަށް ބަދަލު ގެނެސްފައިވެ އެވެ. މި ބަދަލާ އެކު، އަމިއްލަ އިންޝުއަރެންސް ޕޮލިސީން ކަވަރޭޖު ނުލިބި އަމިއްލަ ޖީބުން ފައިސާ ދައްކަންޖެހޭ ހުރިހާ ހާލަތެއްގައި އާސަންދަ ކަވަރޭޖު ކުރިއެކޭ ވެސް އެއްގޮތަށް ލިބިގެންދާނެ އެވެ.
އެހެން ނަމަވެސް، އޭޑީކޭ ހޮސްޕިޓަލުން ފާހަގަކޮށްފައިވަނީ މި ބަދަލާ ގުޅިގެން ހޮސްޕިޓަލްގެ ކައުންޓަރުން ހިދުމަތް ދިނުމަށް ލަސްތަކެއް އަންނާނެ ކަމަށެވެ. އަދި ޕްރައިވެޓް އިންޝުއަރެންސްގެ ލިމިޓް ހަމަނުވާ ނަމަ، ހިދުމަތް ހޯދަންދާ މީހާގެ އަތުން އެ ހިދުމަތަށްވާ ފުރިހަމަ އަގު ނަގަން ޖެހިދާނެ ކަމަށް ވެސް އެ ހޮސްޕިޓަލުން ބުނެފައިވެ އެވެ.
