އާސަންދައިގެ ބޭހުގެ އަގުތައް މުރާޖައާ ކުރުމުގެ މަސައްކަތުގެ ތެރެއިން ފާހަގަވި މި މައްސަލައިގައި، 500 ޑޮލަރަށް ގަންނަ އިންޖެކްޝަނެއް 23،000 ރުފިޔާއަށް އާސަންދައަށް ބިލުކޮށްފައިވާ ކަމަށް ވެ އެވެ. މިއީ އެއް އިންޖެކްޝަނަކުން 14،000 ރުފިޔާގެ ފައިދާ ނެގި ކަމަށް ބެލެވޭ މައްސަލައެކެވެ.
"އާސަންދައިގެ ނިޒާމުގައި ހުރި މިފަދަ މައްސަލަތައް ދިމާވަނީ އެއް ނިޒާމު އަނެއް ނިޒާމާ ގުޅިގެން މަސައްކަތް ނުކުރާތީ،" ހީނާ ވަލީދު ވިދާޅުވިއެވެ.
މި އިންޖެކްޝަން އެތެރެކުރުމަށް ރަޖިސްޓަރީ ކޮށްފައިވަނީ އެހެން ކުންފުންޏަކުން ނަމަވެސް، އެ ކުންފުނިން މި އިންޖެކްޝަން އެތެރެކޮށްފައި ނުވާ ކަމަށް ވެ އެވެ. އަދި ލޮލުގެ ފަރުވާދޭ މަރުކަޒުން މި އިންޖެކްޝަން ވިއްކާފައިވަނީ ބޭސް އެތެރެކުރުމުގެ ހުއްދަ ނެތި ކަމަށް ވެސް ވެ އެވެ.
މި މައްސަލަ މިހާރު ވަނީ ހުއްޓުވައި، އެންސްޕާގެ ވެލްފެއާ އެހީގެ ދަށުން ކޮންޓްރޯލްކުރެވޭ އަގެއްގައި މި އިންޖެކްޝަން ލިބޭނެ އިންތިޒާމު ހަމަޖައްސައިފަ އެވެ. އަދި މި ނިޒާމު އިތުރަށް ހަރުދަނާކުރުމުގެ މަސައްކަތް ކުރިއަށްދާ ކަމަށް ވެސް މައުލޫމާތު ލިބެ އެވެ.
