ބްރޭންޑް ނިއު ކާރުތައް ގެެސް ސަރުކާރުން ޓެކްސީގެ ހިދުމަތް ދިނުމަށް ނިންމާ އެކަން ކުރަމުން އަންނަކަމަށް މިނިސްޓަރު މުހައްމަދު އަމީން ވިދާޅުވީ މިދިޔަ މަހުގެ 29 ގައެވެ. މިކަމާއި ގުޅިގެން ޓެކްސީ ޑްރައިވަރުން ވަނީ އެމީހުންގެ ކަންބޮޑުވުންތައް މަޖިލީހާވެސް ހިއްސާކޮށްފައެވެ.
ރައީސް އޮފީހުގައި ނޫސްވެރިންނށައި ބައްދަލުކޮށް ވާހަކަ ދައްކަވަމުން މިނިސްޓަރު އަމީން މިއަދު ވިދާޅުވީ ސަރުކާރުން ޓެކްސީ ލައިނެއް އުފައްދާކަން އަދި އިއުލާން ނުކުރާ ކަމަށެވެ. އެހެންނަމަވެސް ޓެކްސީ މައްސަލައިގައި އާއްމުންގެ ކަންބޮޑުވުން އިންތިހާއަށް އޮތްކަން ފާހަގަކުރައްވަމުން އެކަން ހައްލުކުރަންޖެހޭކަން މިނިސްޓަރު ފާހަގަކުރެއްވިއެވެ.
މިނިސްޓަރު އަމީން ވިދާޅުވީ ބޭނުންވާ ގަޑިތަކުގައި ޓެކްސީ ނުލިބުމާއި މާލޭގެ ވަކި ތަންތަނަށް ޓެކްސީ ދަތުރުތައް ނުލިބޭކަމުގެ ޝަކުވާތައް އިންތިހާއަށް އޮތްކަމަށެވެ.
މިނިސްޓަރު އަމީން ވިދާޅުވީ، ޓެކްސީ ކުރަނީ އާމްދަނީއެއް ހޯދުމަށް ކަމަށާއި ޑްރައިވަރުންގެ އާމްދަނީއަށް ގެއްލުން ނުވާނެ ގޮތަށް އެ ނިޒާމު ބައްޓަން ނުކުރެވޭނެ ކަމަށެވެ. އަދި ޓެކްސީ ޑްރައިވަރުންނާއި ދެއްކި ވާހަކަތަކަށް ބަދަލު ނުގެންނަވާކަމަށްވެސް އަމީން ވިދާޅުވިއެވެ.
މިދިޔަ މަހުގެ 29ގައި ރައްޔިތުންގެ މަޖިލީހުގެ އިގްތިސާދީ ކޮމިޓީގައި ވާހަކަ ދައްކަވަމުން މިނިސްޓަރު އަމީން ވިދާޅުވީ ސަރުކާރުން ޓެކްސީގެ ހިދުމަތް ދިނުމަށް ސަރުކާރު ހިއްސާވާ ކުންފުންޏަކާ ހަވާލު ކުރަން ނިންމާ އެ މަސައްކަތް ކުރަމުން އަންނަކަމަށެވެ. އަދި ހިދުމަތް ދޭން ފަށާނީ މުޅިން އާ ކާރުތައް ގެނެސްގެނަކަމަށްވެސް މިނިސްޓަރު އަމީން ވިދާޅުވިއެވެ. އަދި ތަކެތި ޕާކުކުރަން ބިންތައް ކަނޑައަޅާ ކުރިޔަށް އޮތް 10 ވަރަކަށް ދުވަސްތެރޭ މިނިސްޓްރީއަށް ލިބޭނެކަމަށްވެސް އަމީން ވިދާޅުވިއެވެ.
