މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ކުއްލި މައްސަލައެއްގެ ގޮތުގައި ހުށަހަޅާ މައްސަލައިގައި ބަޔާންކުރާ ކަންކަން ވާންޖެހޭނީ ކުއްލިއަކަށް ހިނގައިގެން އުޅޭ ކަމަކަށް ކަމަށާއި އަދި އެއީ ވޭތުވެދިޔަ ހަތް ދުވަހުގެ ތެރޭގައި ހިނގައިގެން އުޅޭ ކަމަކަށް ވާންޖެހޭނެ ކަމަށެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅި މި މައްސަލައިގައި ބުނެފައިވަނީ މި އަހަރުގެ މިހާތަނަށް ހޮސްޕިޓަލްތަކާއި ކްލިނިކްތަކުން ހިދުމަތް ހޯދުމަށް ދާ ދިވެހި ރައްޔިތުންނަށް އާސަންދައިގެ ހިދުމަތް ދިނުން ހުއްޓައިލަމުންދާ ކަމަށެވެ. އަދި ބޭސްސިޓީއަށް ބޭސް ދޫކުރުމުގައި ލިބެމުންއައި އާސަންދައިގެ ހިދުމަތް ނުލިބި، އެ ކަންކަމަށް އަމިއްލަ އަތުން ހަރަދުކުރަންޖެހުމުގެ ކަންބޮޑުވުން އިތުރުވެފައިވާ ކަމަށެވެ.
އެޑިއުކޭޝަން މިނިސްޓަރާ ސުވާލު ކުރުމުގެ ވަގުތު ނިމުމަށް ފަހު މަޖިލީހުގެ ރައީސް ވަނީ އެ މައްސަލައިގެ ބަހުސް ތަޅުމުގައި ކުރުމާ މެދު ވޯޓަކަށް ދެވެން ނެތް ކަން އިއުލާނު ކުރައްވާފައެވެ.
