ހެލްތު މިނިސްޓްރީން މިއަދު ބުނީ މި އެކްސްޕޯގައި މާލެ ސަރަހައްދުގެ ހޮސްޕިޓަލްތަކާއި ކްލިނިކްތަކާއި ޖަމިއްޔާތަކުން ބައިވެރިވާ ގޮތަށް 50 ސްޓޯލް ބަހައްޓާނެ ކަމަށެވެ. އެކްސްޕޯ ކުރިއަށްދާނީ މާދަމާ ރޭގަނޑު 8 އިން 11 އަށާއި އަންނަ ހުކުރު ދުވަހުގެ ހަވީރު 4 އިން 6 އަށާއި ރޭގަނޑު 8 އިން 11 އަށެވެ.
އެކްސްޕޯގައި ސިއްހީ ދާއިރާއިން ތައުލީމު ހާސިލުކުރަން ބޭނުންވާ ފަރާތްތަކަށް މައުލޫމާތު ދިނުމާއި، ޑޮކްޓަރަށް ދެއްކުމާއި ހެލްތު ސްކްރީނިންގ ހެދުމުގެ ހިދުމަތް ދޭނެއެވެ. އަދި އެކި ބަލިތަކާ ގުޅޭ މައުލޫމާތާއި އިރުޝާދު ވެސް ދޭނެއެވެ.
މީގެ އިތުރުން ކުޑަކުދިންގެ ހެލްތު ޗެކަޕާއި ރަނގަޅު ކާނާއާ ބެހޭ މައުލޫމާތު ދިނުމާއި، ވެކްސިންގެ މައުލޫމާތު ދިނުމުގެ ހިދުމަތްތައް ވެސް ލިބެން ހުންނާނެއެވެ. ބިދޭސީންނަށް އަމާޒުކޮށްގެން ހެލްތު ސްކްރީނިންގ އާއި ނަފްސާނީ ދުޅަހެޔޮކަމާ ގުޅޭ މައުލޫމާތު ދިނުމުގެ ހިދުމަތްތައް ވެސް މި އެކްސްޕޯގައި ހިމެނެއެވެ.
