އެމްޑީޕީގެ ޕާލަމެންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމެއްގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ ޕީއެސްއައިޕީ މަޝްރޫއުތަކަށް ހަތަރު ބިލިއަން ރުފިޔާ ބަޖެޓްގައި އޮތް ނަމަވެސް އޭގެ ތަފްސީލެއް އަދި އެ އަދަދު ގެނައި ގޮތެއް އެނގެން ނެތް ކަމަށެވެ.
އެ ތަފްސީލް ހާމަކުރަން ޖެހޭނެ ކަމަށާއި އަދި ތަފްސީލް ހޯދަން ލިޔުމުން އެދޭނެ ކަމަށް އޭނާ ވިދާޅުވި އެވެ.
މި މަހުގެ 20 ވަނަ ދުވަހު ބަޖެޓުގެ މަސައްކަތް ނިންމަންޖެހޭކަން ފާހަަގަކުރައްވައި ބަޖެޓު ދިރާސާކުރަން މިހާރު އޮތީ 14 ވަރަކަށް ދުވަހުގެ މުހުލަތެއް ކަމަށާއި، އެފަދަ މުއްދަތެއްގަައި ބަޖެޓު ރަނގަޅަށް ދިރާސާކުރާނެ ގޮތާމެދު އެމްޑީޕީގެ މަޖިލިސް މެމްބަރުން މިއަދު ވަނީ ސުވާލު އުފައްދަވާފަ އެވެ.
ފިނޭންސް މިނިސްޓްރީން އަންނަ އަހަރަށް ލަފާކޮށް ހުށަހެޅީ 56.6 ބިލިއަން ރުފިޔާގެ ބަޖެޓެކެވެ. ބަޖެޓުގެ ހަރަދު 49.2 ބިލިއަން ރުފިޔާއަށް އަރާނެ ކަމަށް ލަފާކޮށްފައިވާއިރު އާމްދަނީ އާއި ހިލޭ އެހީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ވަނީ ލަފާކޮށްފަ އެވެ.
ހަރަދު ކުޑަކުރުމަށް އަންނަ އަހަރު ވަރުގަދަ ފިޔަވަޅުތަކެއް ތަންފީޒުކުރުމަށް ސަރުކާރުން ވަނީ ނިންމާފަ އެވެ. މި ފިޔަވަޅުތަކާއެކު އަންނަ އަހަރު 6.6 ބިލިއަން ރުފިޔާ ކުޑަކުރެވޭނެ ކަމަށް ސަރުކާރުން ލަފާކުރެ އެވެ.
