ޓްރަމްޕް ރައީސްކަން ކާމިޔާބުކުރެއްވި އިރު، ގާނޫނު ހަދާ މަޖިލީހުގެ މަތިގެ، ސެނެޓްގެ އަގުލަބިއްޔަތު ވެސް ޑިމޮކްރެޓްސްގެ އަތުން ޓްރަމްޕްގެ ރިޕަބްލިކަން އަށް ވަނީ ލިބިފަ އެވެ.
މިހާރު ހަނި އަގުލަބިޔަތަކުން ރިޕަބްލިކަން ޕާޓީގެ މެމްބަރުން ކޮންޓްރޯލް ކުރަމުން އަންނަ ދަށުގޭގެ ކޮންޓްރޯލް ވެސް ރިޕަބްލިކަން ޕާޓީން ހޯދުމަށް އެ މީހުން އަންނަނީ މަސައްކަތް ކުރަމުންނެވެ. މިހާރު ދަށުގޭގެ އަގުލަބިއްޔަތު ރިޕަބްލިކަން ޕާޓީއަށް ލިބިފައިވަނީ 220-212ގެ ކުޑަ ތަފާތަކުންނެވެ.
އެމެރިކާގައި އިއްޔެ ބޭއްވި ރިޔާސީ އިންތިހާބުގައި 224 މިލިއަން މީހުންނަށް ވޯޓުލުމުގެ ހައްގު ލިބިފައިވާއިރު، މިހާތަނަށް 138 މިލިއަން ވޯޓު ވަނީ ގުނައިފަ އެވެ. އެ ނަތީޖާއިން ދައްކާ ގޮތުގައި ޓްރަމްޕަށް 51.06 ޕަސެންޓު ވޯޓު ލިބިފައިވާއިރު ނައިބު ރައީސް އަދި ވެރިކަން ކުރާ ޑިމޮކްރެޓިކް ޕާޓީގެ ކެންޑިޑޭޓް ކަމަލާ ހެރިސްއަށް ލިބިފައިވަނީ 47.45 ޕަސެންޓް ވޯޓެވެ.
ޓްރަމްޕް ވަނީ ކާމިޔާބީ އިއުލާން ކުރައްވައި އެމެރިކާގެ ރައްޔިތުންނަށް ޝުކުރު އަދާކުރައްވައިފަ އެވެ. އަދި ދެން އޮތީ އެގައުމުގެ ރަން ޒަމާނެއް ކަމަށް ވިދާޅުވި އެވެ.
ރިޔާސީ އިންތިހާބުގެ ނަތީޖާއާ ގުޅޭ ގޮތުން ހެރިސް މިހާތަނަށް އެއްޗެކޭ ވިދާޅުވެފައިނުވެ އެވެ.
ޓްރަމް ވާނީ އެމެރިކާގެ 47 ވަނަ ރައީސަށެވެ. ޓްރަމްޕް މަގާމުގެ ހުވާކުރައްވާނީ އަންނަ އަހަރުގެ ޖެނުއަރީ މަހުގެ 20 ވަނަ ދުވަހު އެވެ.
