ޖޭއެސްސީން ބުނި ގޮތުގައި 2021 ވަނަ އަހަރުގެ ޑިސެންބަރު 16ގައި ތަސްދީގުކޮށް، އޭގެ ހަ މަސް ފަހުން ގާނޫނަށް އަމަލުކުރަން ފެށުމާ އެކު ރާއްޖޭގެ ކޯޓުތަކުގައި މަދަނީ މައްސަލަތައް ތޮއްޖެހި، މައްސަލަތައް ލަސްވެ އަދި މައްސަލަތަކުގެ ހުކުމްތައް ތަންފީޒުނުވެ މުޅި ނިޒާމަށް މިއިން ދުވަހަކު ކުރިމަތި ނުވާވަރުގެ ދަތިތައް ވަނީ ކުރިމަތިވެފަ އެވެ.
އޭގެ ސަބަބުން ބޭންކުތަކާއި، ވިޔަފާރި އިންސްޓިޓިއުޝަންތަކާއި، އާއްމު ރައްޔިތުންގެ ވިޔަފާރިތައް ހުއްޓި، މަދަނީ އަދުލުގެ ނިޒާމަށް ބޮޑެތި މައްސަލަތަކެއް ކުރިމަތިވެފައިވާ ކަމަށް އެ ކޮމިޝަނުން ފާހަގަކުރި އެވެ. އެ މައްސަލަތަކަށް ހައްލެއް ހޯދެން އޮތީ މިހިނދުން މިހިނދަށް ގާނޫނަށް އިސްލާހުތަކެއް ގެނެވިގެންކަމަށް ޖޭއެސްސީން ބުންޏެވެ.
އެހެންކަމުން ޖޭއެސްސީގެ އިސްނެގުމުގެ މަތިން ރާއްޖޭގެ ޖުމްހޫރިއްޔާގެ ގާނޫނުއަސާސީ އާއި، އިންޓަނޭޝަނަލަށް ބެސްޓް ޕްރެކްޓިސްއާ އެއްގޮތަށް، (މަދަނީ އިޖުރާއާތުގެ ގާނޫނު) އަށް ގެންނަން ފެންނަ އިޞްލާޙުތައް ބަންޑާރަނައިބުގެ އޮފީހަށް ފޮނުވާފައިވާ ކަމަށް ޖޭއެސްސީން ބުނެ އެވެ.
އެ ބިލް ރައްޔިތުންގެ މަޖިލީހުގެ އިދާރާއަށް ފޮނުވުމަށް 2024 ނޮވެންބަރު 04 ވަނަ ދުވަހު ބޭއްވުނު ކޮމިޝަންގެ 57 ވަނަ ޖަލްސާގައި ކަމަށް ޖޭއެސްސީން ބުންޏެވެ.
ކޯޓުތަކުގައި މައްސަލަތައް ލަސްވާ އެންމެ ބޮޑު އެއް ސަބަބަކީ ޖާގައިގެ ދަތިކަމާއި މުވައްޒަފުންގެ ދަތިކަމެވެ. އެ މައްސަލަތަކަށް ހައްލު ހޯދައިދޭނެ ކަމަށް ސަރުކާރުން މީގެ ކުރިން ވަނީ ބުނެފައެވެ.
