އާސިފްގެ މައްޗަށް ތުހުމަތުކުރެވުނީ ޕްރިޒަންސް ކްލަބުގެ ފައިސާތަކެއް އަމިއްލަ އެކައުންޓްތަކަކަށް ޖަމާކުރި މައްސަލައެއްގައެވެ.
ޕްރިޒަންސް ކުލަބުގެ އެކައުންޓުން 200،000ރ.އަށް ވުރެ ގިނަ ރުފިޔާ އެކި އެކައުންޓުތަކަށް ޖަމާކުރިކަމަށް ބުނާ މައްސަލައެއް ފެންމަތިވީ މިދިޔަ ޖުލައިމަހުގެ ތެރޭގައެވެ. އެކަމުގެ ފަހުތުގައި ހުރީ އެ ކްލަބުގެ ރައީސްއަށް ހުންނެވި އާސިފްކަމަށް މުވައްޒަފުން ތުހުމަތުކުރެއެވެ.
މި މައްސަލައާއި ގުޅިގެން އާސިފް ވަނީ އިއްޔެއިން ފެށިގެން މަގާމުން ސަސްޕެންޑްކޮށްފައެވެ. އޭނާ ސަސްޕެންޑްކުރިކަން އަންގާ މުވައްޒަފުންނަށް ފޮނުވި ލިޔުމުގައިވަނީ ކަރެކްޝަންސްގެ އެޗްއާރުގެ ހުއްދަ ނެތި މުހައްމަދު އާސިފް އެ ސާވިސްގެ އެއްވެސް އިމާރާތަކަށް ވަނުމަކީ މަނާ ކަމެއްކަމަށެވެ.
ޕްރިޒަންސް ކްލަބުގެ ފައިސާތަކެއް ގެއްލުނު މައްސަލަ ފެންމަތިވުމުން އާސިފް ވަނީ ކްލަބްގެ އެ އެކައުންޓަށް 70،000 ރުފިޔާ ޖަމާކޮށްފައެވެ. އެހެންނަމަވެސް އެއީ ކީއްވެ ޖަމާކުރި ފައިސާކަމެއް ނުބުނެއެވެ.
މި މައްސަލަ ކަރެކްޝަނުން އަންނަނީ ބަލަމުންނެވެ.
