ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ އެކްސް މެދުވެރިކޮށް ކުރެއްވި ޕޯސްޓެއްގައި ވިދާޅުވީ މިއީ ރައީސް ޑރ މުއިއްޒުގެ 33 ޕަސެންޓް އިއާދަކުރަނިވި ހަކަތައިގެ އަމާޒަށް ވާސިލްވުމަށް ސޯލާ ސޯސްތަކުން ބޭރަށް ދެމެހެއްޓެނިވި ހަކަތަ ފުޅާކުރުމުގެ ގޮތުން އިފްތިތާހު ކުރި މަޝްރޫއެއް ކަަމަށް އެމްޑީ ފަހުމީ ވިދާޅުވިއެވެ.
ރާޅު މޮނިޓަރިން ޓެކްނޮލޮޖީ ބޭނުންކުރުމަކީ ރާއްޖެއިން ދެމެހެއްޓެނިވި ހަކަތައަށް ހައްލު ހޯދުމަށް އަދި ރައީސް ޑރ.މުހައްމަދު މުއިއްޒުގެ އެ މުހިއްމު ވައުދު ހާސިލްކުރުމުގައި ލިބުނު މުހިންމު ކުރިއެރުމެއް ކަމަށް ފަހުމީ ފާހަގަކުރެއްވިއެވެ.
ރާޅުން ހަކަތަ ހޯދައިގެން ސްޓެލްކޯއިން ދަނީ އިއާދަކުރަނިވި ހަކަތަގެ ވަކި ސަރަހައްދުތައް، އާންމުކޮށް ބޭނުން ކުރާ ސޯލާ އިން ބޭރަށް ދިޔުމަށް ދެމެހެއްޓެނިވި ތަރައްގީއަށް އާ ދޮރެއް ހުޅުވާލަމުން ކަމަށް ފަހުމީ ފާހަގަކުރެއްވިއެވެ.
އޭގެއިތުރުން ކަނޑުގެ ރާޅުތަކަކީ އިރުގެ ހަކަތައަށް ވުރެ މޫސުމުގެ ހާލަތުގެ އަސަރު ކުޑަ އެއްޗަކަަށްވުމުން ރާޅު ހަކަތައިން ގިނަ ފައިދާތަކެއް ލިބިގެންދާއިރު، އޭގެ ތެރޭގައި އެއްގޮތަކަށް ހަކަތަ ފޯރުކޮށްދިނުން ހިމެނޭ ކަމަށް ފަހުމީ އެ ޕޯސްޓްގައި ފާހަގަކުރެއްވިއެވެ.
މި މަސައްކަތަކީ ސްޓެލްކޯއިން އިނޮވޭޝަނަށް ކުރާ މަސައްކަތަށް އަލިއަޅުވާލާ އަދި ސާފު، ދެމެހެއްޓެނިވި މުސްތަގުބަލެއް ހޯދުމަށް ރާއްޖޭގެ ތަސައްވުރާ އެއްގޮތް މަސައްކަތެއްކަމަށް ފަހުމީ ފާހަގަކުރައްވައެވެ.
