މިދިޔަ ސަރުކާރުން އިއުލާންކުރި ބޯހިޔާވަހި ސްކީމްގެ ދަށުން ގުޅިފަޅުން މާލޭ މީހުންނަށް ގޯތި ދީ ވެރިކަން ނިންމުމުގެ ކުރިން ވަނީ ރަޖިސްޓްރީވެސް ހަވާލުކޮށްފައެވެ. އެހެންނަމަވެސް މި ސަރުކާރުން ވަނީ އެ ތަނުގެ ލޭންޑް ޔޫޒް ޕްލޭނަށް ބަދަލުތައް ގެނެސް ގޯތި ލިބޭ ތަންތަން ކަނޑައަޅާ މިދިޔަ މަހު ފަހުކޮޅު އަލުން ގުރުއަތު ނަގާފައެވެ.
ދައުލަތުގެ މީޑިއާގައި ވާހަކަ ދައްކަވަމުން ހައުސިން މިނިސްޓަރު އަލީ ހައިދަރު ވިދާޅުވީ ގުޅުފަޅުން ގޯތި ދިނުމަށް އެތަނުން ހިއްކަންޖެހޭ އެންމެ ފުން ސަރަހައްދު ހިއްކުމުގެ މަސައްކަތް ވަރަށް އަވަހަށް ފަށާނެކަމަށެވެ. އެހެންނަމަވެސް އެ މަސައްކަތް ފަށާނެ ވަކި ތާރީހެއް މިނިސްޓަރު ވިދާޅެއް ނުވެއެވެ.
ގުޅިފަޅުން ގޯތި ލިބުނު ފަރާތްތަކަށް ބިން ހަވާލުކުރެވޭނީ ތިލަމާލެ ބްރިޖްގެ މަސައްކަތް ނިމުމުން ކަމަށް ހައުސިން މިނިސްޓަރު އަލީ ހައިދަރު މީގެ ކުރިން ވަނީ ވިދާޅުވެފައެވެ.
މިދިޔަ އިބްރާހިމް މުހައްމަދު ސާލިހްގެ ވެރިކަމުގައި ގުޅި ފަޅު ހިއްކަން ހަވާލުކުރީ ނެދަލެންޑްސްގެ ބޮސްކާލިސް ކުންފުންޏާއެވެ. އެ ކުންފުނިން ގުޅިފަޅުން 150 ހެކްޓަރުގެ ބިން ހިއްކައިފައެވެ. ރައީސް މުއިއްޒު ވަނީ ގުޅި ފަޅުން އިތުރު 85 ހެކްޓަރު ބިން ހިއްކާނެ ކަން އިއުލާންކުރައްވާފައެވެ. އަދި އެ މަސައްކަތް ހަވާލުކުރާނީ އެމްޓީސީސީއާކަންވެސް ސަރުކާރުން ވަނީ ހާމަކޮށްފައެވެ.
އެހެންނަމަވެސް އެ މަސައްކަތް އަދި މިހާތަނަށް ފަށަފައެއް ނުވެއެވެ. ސަބަބެއްކަމަށް ސަރުކާރުން ބުނީ އެކަމަށް ބޭނުންވާ ފައިސާ އަދި ހަމަޖެހިފައި ނުވާތީކަމަށެވެ.
ގުޅިފަޅުން ދޫކުރަނީ ހަތް ސައިޒެއްގެ 3،520 ގޯއްޗެވެ.
