މި ބައްދަލުކުރެއްވުމުގައި ދެ ބޭފުޅުންވަނީ ރާއްޖެއަށް މިވަގުތަށް އެހީތެރިކަން ބޭނުންވާ ދާއިރާތަކާއި، އިތުރު ދާއިރާތަކުން ގުޅުން ބަދަހިކުރެއްވުމާގުޅޭ ގޮތުން ފުޅާ ދާއިރާއެއްގައި މަޝްވަރާކުރައްވާފަ އެވެ.
ހަމައެހެންމެ ސައުދީ ފަންޑުގެ އެހީގައި ރާއްޖޭގައި މިވަގުތު ކުރިއަށްދާ ބައެއް ބޮޑެތި މަޝްރޫއުތަކުގެ މައުލޫމާތު ވަނީ ހިއްސާކުރައްވާފަ އެވެ.
އެ ގޮތުން ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމުގެ މަސައްކަތާއި މަސްވެރިކަމުގެ ސިނާއަތާ ގުޅުންހުރި އެކި މަޝްރޫއުތައް މުއްދަތަށް ނިންމުމަށް ކުރަންޖެހޭ އެންމެހައި މަސައްކަތްތައް ކުރާނެކަމުގެ ޔަގީންކަން ދެފަރާތުން ވެސް ދިން ކަމަށް ރައީސް އޮފީހުން ބުންޏެވެ.
އޭގެ އިތުރުން ރާއްޖެ އާއި ސައުދީ ފަންޑާ ދެމެދު އޮންނަ ގުޅުން އިތުރަށް ވަރުގަދަކުރުމަށް ވެސް މަޝްވަރާ ކުރި ކަމަށް ރައީސް އޮފީހުން ބުންޏެވެ.
ރާއްޖޭގެ ތަރައްގީގައި ސައުދީ ފަންޑުން އަންނަނީ މުހިންމު ދައުރެއް އަދާކުރަމުންނެވެ. ވަކިން ހާއްސަކޮށް އުމްރާނީ އިގްތިސާދީ މަޝްރޫއުތަކަށް އިންވެސްޓްކުރުމާއި، މީހުން ބިނާކުރުމާއި، ސިއްހީ އަދި ތައުލީމީ ދާއިރާތައްފަދަ އާންމު ރައްޔިތުންނާގުޅުންހުރި އެކި ދާއިރާތަކުން ސައުދީ ފަންޑުން މިހާތަނަށްވެސް ވަނީ ރާއްޖެއަށް ބޮޑެތި އެހީތަކެއް ފޯރުކޮށްދީފަ އެވެ.
މީގެ އިތުރުން ރާއްޖޭގެ އިގްތިސާދީ އަދި ތަރައްގީގެ ލަނޑުދަނޑިތައް ހާސިލްކުރުމަށް އެކުގައި މަސައްކަތްކުރާނެ ކަމުގެ ޔަގީންކަން ސައުދީ ފަންޑުން ދީފައިވާ ކަމަށް ވެސް ރައީސް އޮފީހުން ބުންޏެވެ.
