އެމްޑީޕީން "ލާމަރުކަޒީ ރާއްޖެ" ގެ ނަމުގައި ބޭއްވި ޖަލްސާގައި ވާހަކަފުޅު ދައްކަވަމުން ނިޔާޒު ވިދާޅުވީ، ކައުންސިލުތަކުން ދެ މެމްބަރުން އުނިކޮށްގެން 30،000 ރުފިޔާ މަދުކުރެވުނު ކަމުގައި ވިޔަސް، ސަރުކާރުން އައްޔަންކޮށްފައިވާ ޕޮލިޓިކަލް ޑިރެކްޓަރުންގެ އަދަދު މަދުކޮށްފި ނަމަ އެއަށްވުރެ މާ ގިނަ އަދަދެއްގެ ފައިސާ ސަލާމަތްކުރެވޭނެ ކަމަށެވެ.
ނިޔާޒު ވިދާޅުވި ގޮތުގައި މި ސަރުކާރުން 3،000 އަށްވުރެ ގިނަ މީހުންނަށް ވަޒީފާ ދީފައިވަނީ އިންތިހާބަކާ ނުލައެވެ. އަދި މި މީހުންނަށް ދައުލަތުގެ ބަޖެޓުން ބޮޑު ހޭދައެއް ކުރަމުންދާ ކަމަށް ވެސް ވިދާޅުވި އެވެ.
ރަށްރަށުގައި ތިބެންޖެހޭ ކައުންސިލަރުންގެ އަދަދު މިހާރު ވެސް ކަނޑައަޅާފައި އޮތީ އާބާދީއަށް ބަލައިގެން ކަމަށް ނިޔާޒު ވިދާޅުވި އެވެ. އެގޮތުން އާބާދީ ކުޑަ ރަށްރަށުގައި ކައުންސިލަރުންގެ އަދަދު މަދުވާނެ ކަމަށާއި، އާބާދީ ބޮޑެތި ރަށްރަށުގައި ކައުންސިލަރުންގެ އަދަދު ގިނަވާނެ ކަމަށް ވެސް ވިދާޅުވި އެވެ.
