ހުޅުމާލޭ ސެންޓްރަލް ޕާކް ކައިރިން އުރީދޫ އޮފީސް އިމާރާތް ކުރިމަތީގައި މިދިޔަ ސެޕްޓެމްބަރު 6 ވަނަދުވަހުގެރޭ ދަންވަރު ހިންގި އެކްސިޑެންޓްގައި އަނިޔާވި ލ. އިސްދޫ ،ބީޗް ހައުސް އުމުރުން 23 އަހަރުގެ ހަސަން ސަމާހް މަރުވީ އެކްސިޑެންޓް ވުމުން ހުޅުމާލެ ހޮސްޕިޓަލަށް ގެންގޮސް ފަރުވާދެނިކޮށެވެ.
މި މައްސަލާގައި ކާރު ދުއްވަން އިން އުމުރުން 26 އަހަރުގެ ވިސާމް ވަނީ ހަމަ އެދުވަހު ހައްޔަރުކޮށްފައެވެ. އޭނާއަކީ ކާރު ދުއްވުމުގެ ލައިސެންސް އޮންނަ މީހެއް ނޫންކަމަށް ފުލުހުން ވަނީ ބުނެފައެވެ. އޭނާ ވަނީ ޝަރީއަތް ނިމެންދެން ބަންދުގެ މުއްދަތު ޖަހާފައެވެ.
މި މައްސަލާގައި ވިސާމްގެ މައްޗަށް ކުރަނީ މީހަކު މަރުވެދިއުމުގެ ފަރުވާކުޑަ އަމަލެއް ކުރުމުގެ ކުށުގެ ދައުވާއެވެ. އެދައުވާގައި ވަނީ އޭނާ ކާރު ދުއްވުމުގެ ލައިސަންސް ނެތި، ހުޅުމާލެ ސެންޓްރަލް ޕާކު ކައިރިން އިރުން ހުޅަނގަށް ކާރުގައި ހުއްދަކުރެވިފައިވާ ސްޕީޑަށް ވުރެ ބާރަށް ދުއްވާފައި ދިޔަކަަމަށެވެ. އަދި ހުޅުމާލެ ރީތިގަސްމަގުން ދެކުނުން އުތުރަށް ދުއްވާފައި އައިސް ބަގީޗާހިނގުމަށް ނިކުތް ސައިކަލުގައި، ކޮންޓްރޯލު ނުވެގެންގޮސް ޖެހި އެކްސިޑެންޓްވިކަމަށާއި އޭގެ ސަބަބުން ސައިކަލު ދުއްވަން އިން ސަމާހު މަރުވެފައިވާކަމށް ދައުވާގައިވެއެވެ.
