އޭއައިއައިބީގެ ރައީސް މިހެން ވިދާޅުވީ ރައީސް ޑރ މުހައްމަދު މުއިއްޒުއާއެކު ބޭއްވި ބައްދަލުކުރެއްވުމުގަ އެވެ.
މި ބައްދަލުކުރެއްވުން ކުރިއަށް ގެންގޮސްފައި ވަނީ އެކުވެރި ދައުލަތްތަކުގެ ފްރޭމްވާކް ކޮންވެންޝަން އޮން ކްލައިމެޓް ޗޭންޖު (ޔޫއެންއެފްސީސީސީ)ގެ ކޮންފަރެންސް އޮފް ޕާޓީސްގެ 29 ވަނަ ސެޝަން (ކޮޕް29)ގެ ހަވާސާގަ އެވެ.
އެ ބައްދަލުވުމުގައި ރައީސް ވަނީ، އޭއައިއައިބީން ރާއްޖެއަށް ދެއްވާ އެހީއަށް ޝުކުރުއަދާކުރައްވައި، އެ އެހީތެރިކަމަކީ ރާއްޖޭގެ ތަރައްގީގެ މަޝްރޫއުތަކަށް ޒަރޫރީ އެހީއެއްކަން ފާހަގަކުރައްވާފަ އެވެ.
އޭއައިއައިބީގެ ރައީސް ޖިން ގެ ވާހަކަފުޅުގައި ވަނީ، ރާއްޖެއިން ދެމެހެއްޓެނިވި ތަރައްގީއަށާއި ވިލުންތެރިކަން އިތުރުކުރުމަށް ކުރާ މަސައްކަތްތަކުގައި އެއްބާރުލުން ލިބެމުންދާނެ ކަމުގެ ޔަގީންކަން އަރުވާފަ އެވެ.
އަދި ދިވެހިރާއްޖެއިން އެކުލަވާލުމުގެ މަސައްކަތް ފަށާފައިވާ، ގައުމީ ތަރައްގީގެ 20 އަހަރުގެ މާސްޓާ ޕްލޭން ފަދަ ދުރު ރާސްތާއަށް އެކަށައަޅާފައިވާ ލަނޑުދަނޑިތައް ހާސިލްލުކުރުމަށާއި، މޫސުމީ ބަދަލުތަކަށް ހޭނުމަށް ކުރާ މަސައްކަތްތައް ހަރުދަނާކުރުމަށް، އޭއައިއައިބީގެ އެއްބާރުލުމުގެ މުހިންމުކަމުގެ މައްޗަށް އަލިއަޅުއްވާލެއްވި އެވެ.
މި ބައްދަލުވުމުގައި ދެ ބޭފުޅުން ވެސް ވަނީ، ވަސީލަތްތައް ސިންދަފާތުކުރުމުގެ މުހިންމުގެ މައްޗަށް މަޝްވަރާކޮށް، ރާއްޖޭގެ މޫސުމީ އަދި ތަރައްގީގެ ލަނޑުދަނޑިތަކާ ގުޅުންހުރި ދާއިރާތަކުގައި އެކުގައި މަސައްކަތްކުރުމަށް އެއްބަސްވެވަޑައިގެންފަ އެވެ.
