ރިޕޯޓްތައް ބުނާ ގޮތުން ރަނިއޭރީ އަލުން ކޯޗިންގެ ތެރެއަށް އަންނާނީ އިޓަލީގެ ރޯމާގެ ކޯޗުގެ ގޮތުގައެވެ. މި ސީޒަންގެ ނިޔަލަށް ރޯމާއާ ހަވާލުވާން ރަނިއޭރީ ނިންމާފައިވާ ކަމަށް ރިޕޯޓްތައް ބުނެއެވެ.
2016 ވަނަ އަހަރު ލެސްޓާ ސިޓީއާއެކު ޕްރިމިއާ ލީގުގެ ޗެމްޕިއަންކަން ހޯދި ރަނިއޭރީ އަލުން އެނބުރި ކޯޗިންގެ ތެރެއަށް އައުމުގެ މަޝްވަރާތައް ކުރިއަށްދިޔައީ ލަންޑަނުގައެވެ. ލަންޑަނުގައި ކުރިއަށް ގެންދިޔަ މަޝްވަރާތަކަށް ފަހު ސީޒަން ނިމެންދެން ރޯމާއާ އެކު އެއްބަސްވުމެއް ހަދަން ރަނިއޭރީވަނީ ނިންމާފައި ކަމަށް އިޓަލީގެ މީޑިއާ ރިޕޯޓްތައް ބުނެއެވެ.
އުމުރުން 73 އަހަރުގެ ރަނިއޭރީ ކުރިންވެސް ރޯމާއަށް ކޯޗުކޮށްދިނެވެ. އަދި އޭނާ ކުރިން ރޯމާއަށް ކުޅެފައިވެސްވެއެވެ. އޭނާވަނީ ނަޕޯލީ، ފިއޮރެންޓީނާ، ވެލެންސިޔާ އަދި ޔުވެންޓަސްއާއި އިންޓަމިލާނަށްވެސް ކުރިން ކޯޗު ކޮށްދީފައެވެ. އަދި ޗެލްސީއާ ފުލަމް އަދި ލެސްޓާ ސިޓީއަށްވެސް ރަނިއޭރީ ކުރިން ކޯޗު ކޮށްދިނެވެ. އޭނާވަނީ ދުނިޔޭގެ އެންމެ މޮޅު ކޯޗުގެ މަގާމުވެސް ހޯދާފައެވެ.
