ހައުސިން މިނިސްޓްރީން ބުނީ މި ހަފުތާ ނިމުމުގެ ކުރިން ލިސްޓު ނެރޭނެ ކަމަށް ކުރިން ބުނެފައި ވީނަމަވެސް، އެންޓި ކޮރަޕްޝަން ކޮމިޝަނުން ފާހަގަކޮށްފައިވާ މައްސަލަތަކާ ގުޅިގެން އިތުރަށް ބަލަންޖެހޭ ކަންކަން ހުރުމުން ލިސްޓު ނެރުން ވަނީ ފަސްކޮށްފަ އެވެ.
އޭސީސީން ބުނެފައިވަނީ ކުރިން ނެރުނު ދާއިމީ ލިސްޓުގައި ހިމެނޭ 60 ޕަސަންޓު މީހުންނަކީ މަކަރާއި ހީލަތުން ފްލެޓް ހޯދި މީހުން ކަމަށެވެ. އެހެންކަމުން އެ ލިސްޓު އަލުން މުރާޖައާ ކުރުމަށް އޭސީސީން ވަނީ އަންގާފަ އެވެ.
ހައުސިން މިނިސްޓްރީން ބުނީ ފްލެޓަށް އެދި ހުށަހަޅާފައިވާ 20،697 ފޯމު ބެލުމުގައި ކަށަވަރުކުރަންޖެހޭ ގިނަ ކަންކަން ހުރުމުން އިތުރު މުއްދަތެއް ބޭނުންވާ ކަމަށެވެ. އަދި އިތުރު މުއްދަތެއް ނަގާނެ ކަމުގައި ވިޔަސް، ފްލެޓްތައް ލިބެންވާ ހައްގުވެރިންނަށް ލިބޭކަން ކަށަވަރުކުރުމަކީ ސަރުކާރުގެ އަމާޒު ކަމަށް އެ މިނިސްޓްރީން ބުންޏެވެ.
