ރާއްޖެޓީވީގެ "ފަށާއިރު" ޕްރޮގްރާމުގައި ވާހަކަ ދައްކަވަމުން ސާލިހް ވަނީ މިިދިޔަ ރިޔާސީ އިންތިހާބު ނިމި ޖެހިގެން އައި ދުވަހު ރައީސް ޔާމީން ޖަލުން ގެއަށް ބަދަލުކުރީ ރައިސް މުއިއްޒު އެދިވަޑައިގެންކަމަށް ވިދާޅުވެ ދެކެވޭ ވާހަކަތަކުގެ ތަފްސީލު ހިއްސާކުރައްވާފައެވެ.
ރައީސް ސާލިހް ވިދާޅުވީ އިންތިހާބުން ޑރ. މުއިއްޒަށް ކާމިޔާބު ލިބިވަޑައިގަތުމުން އެރޭ އިންތިހާބީ ރައީސްގެ ހައިސިއްޔަތުން ޑރ. މުއިއްޒަށްް ގުޅުއްވާ މަރުހަބާ ދެންނެވިކަމަށެވެ. އެރޭ ދެކެވުނު ވާހަކަތަކުގައިވެސް ރައީސް ޔާމިންގެ ވާހަކަ ޑރ މުއިއްޒު ނުދައްކަވާކަމަށް ސާލިހް ވިދާޅުވިއެވެ.
އޭގެ ފަހުން ޖެހިގެން އައި ދުވަހު އިންތިހާބީ ރައީސްގެ ހައިސިއްޔަތު ރައީސް އޮފީހުގައި ޑރ. މުއިއްޒާއި ބައްދަލުކުރެއްވިކަން ސާލިހް ފާހަގަކުރެއްވިއެވެ. ސާލިހް ވިދާޅުވީ ޑރ. މުއިއްޒާއި އަބްދުއްރަހީމް ވަޑައިގެންނެވި ބައްދަލުވުމުގައިވެސް ދެއްކެވީ ޓްރާންސިޝަން ކަންކަން ސުމޫތްކޮށް ގެންދިޔުމުގެ ވާހަކަކަމަށާއި ރައީސް ޔާމީންގެ އެއްވެސް ވާހަކައެއް އެބޭފުޅުން ނުދައްކަވާކަމަށް ސާލިހް ވިދާޅުވިއެވެ.
ރައީސް ޔާމީން ގެއަށް ބަދަލުކުރުމުގެ މަސައްކަތް ސަރުކާރުން ކުރަމުން އަންނަ ވާހަކަ އެދުވަހު އެ ބައްދަލުވުމުގައި ޑރ މުއިއްޒާއި އަބްދުއްރަހީމް ކައިރީގައި ދެންނެވިކަމަށް ސާލިހް ވިދާޅުވިއެވެ.
ރައީސް ޔާމިން ގެއަށް ބަދަލުކުރައްވާ ވާހަކަ ދެންނެވުމުން ޑރ. މުއިއްޒާއި އަބްދުއްރަހީމްގެ މޫނުފުޅުމަތިން ހައިރާންކަަން ފެނުނުކަންވެސް ސާލިހް ވިދާޅުވިއެވެ.
ރައީސް ޔާމިންގެ މައްޗަށް ފުރަތަމަ ހުކުމް ތަންފީޒުކުރަމުން ދިޔައިރު ޕީޕީއެމްގެ ވަރަށް ގިނަ ބޭފުޅުންގެ މެސެޖްތަކެއް ލިބިވަޑައިގެންނެވިކަމަށް ސާލިހް ވިދާޅުވިއެވެ. އޭގެތެރެއިން ގިނަ ބޭފުޅުންނަކީ އެމަނިކުފާނާއި އެކު މަޖިލީހުގައި މަސައްކަތް ކުރެއްވި ބޭފުޅުންކަމަށާއި އެ މެސެޖްތެއް ލިބުނީ ރައީސް ޔާމީން ގެއަށް ބަދަލުކުރުމުގެ އަހަރެއްކުރިންކަމަށް ސާލިހް ވިދާޅުވިއެވެ.
މިނިވަންވުމަށް ފަހު ރައީސް ޔާމީންވެސް ވިދާޅުވީ އެމަނިކުފާނު ގެއަށް ބަދަލުކުރުމުގައި ރައީސް ޑރ. މުއިއްޒުގެ އެއްވެސް މަސައްކަތެއް ނުވާކަމަށެވެ. އެކަން ކުރެއްވީ ކުރީގެ ސަރުކާރަށް ފެނިވަޑައިގެންކަމަށް ތަކުރާރުކޮށް ރައީސް ޔާމީން ގެންދަވަނީ ވިދާޅުވަމުންނެވެ.
