ފިޝަރީޒް މިނިސްޓްރީން މިއަދު ބުނި ގޮތުގައި މިއަހަރުގެ މަސްވެރިންގެ ދުވަސް ފާހަގަ ކުރުމުގެ ގޮތުން މި މިނިސްޓްރީ އިން ކުރިއަށްގެންދާ ހަރަކާތްތަކުގެ ތެރޭގައި ހިމެނޭ ފަރުމަސްވެރިކަމުގެ މުބާރާތް އޮންނާނީ ޑިސެމްބަރު މަހުގެ ހަވަނަ ދުވަހުއެވެ. މި މުބާރާތަކީ ސަރުކާރުގެ މުވައްސަސާތަކާއި ކުންފުނިތަކުގެ ދަށުން ރަޖިސްޓަރކޮށްފައިވާ ނުވަތަ އަމިއްލަގޮތުން ރަޖިސްޓަރކޮށްފައިވާ ޖަމްޢިއްޔާ ޖަމާޢަތްތަކަށް ހުޅުވާލައިގެން ބާއްވާ މުބާރާތެއް ކަމަށް މިނިސްޓްރީން ބުންޏެވެ.
މުބާރާތުގެ ގަވައިދު އޮތް ގޮތުން، އެއްވަނަ ޓީމަށް 25،000 ރުފިޔާ ދޭއިރު، ދެވަނަ ޓީމަށް 20،000 އަދި ތިންވަނަ ޓީމަށް 15،000 ރުފިޔާ ދޭނެ އެވެ. އަދި އެންމެ ބަރު މަސް ބާނާ ފަރާތަކަށް 2،000 ރުފިޔާގެ އިނާމުވެސްވަނީ ހުށަހަޅާފައެވެ.
މުބާރާތުގައި މަސްތައް ކެޓަގަރައިޒް ކޮށްފައިވާ ގޮތުން، ރަތްމަސް، ފިލޮޅު، ގިޔުޅު، ހިބަރު އަދި ކުރުމަހާއި ހަނދި ހިމެނެނީ ކެޓަގަރީ އެކެއްގައެވެ. ކެޓަގަރީ 2 ގައި ހިމެނެނީ ތޮޅި، ގިނިމަސް، މާނިޔާމަސް، ފޮނިޔަމަސް އަދި ފާނައެވެ. އެހެނިހެން މަސްތައް ހިމެނެނީ ތިންވަނަ ކެޓަގަރީގަ އެވެ.
