ސަރުކާރަށް އަހަރެއް ފުރުން ފާހަގަކުރުމުގެ ގޮތުން މީޑިއާގައި ވާހަކަ ދައްކަވަމުން މިނިސްޓަރު އިހްސާން ވިދާޅުވީ ރާއްޖޭގައި އުޅޭ ނަންނަ މަޝްހޫރު ހިހާ ގޭންގެއް އެއްކޮށް ހުއްޓުވާލާނެކަމަށެވެ. އަދި އެކަން ކުރުމުގެ ހިތްވަރާ ގާބިލުކަން ރައީސް ޑރ. މުހައްމަދު މުއިއްޒުގެ އެބަހުރިކަމަށް އިހްސާން ވިދާޅުވިއެވެ.
އިހްސާން ވިދާޅުވީ ރާއްޖޭގައި ގޭންގުތަކުގެ ބާރު ގަދަވެފައިވަނީ ކުރީގެ ސަރުކާރުތަކުން ގޭންގުތަކަށް އެއްބާރުލުންދީފައިވާތީކަމަށެވެ. އަދި މި ސަރުކާރުން ގާނޫނުތައް ތަންފީޒުކުރުމަށް މި ގެންގުޅޭ ވިސްނުން ކުރީ ސަރުކާރުތަކުން ގެންގުޅުނަމަ ގޭންގުތައް ފުޅާވެ އެކަމުގެ ބިރުވެރިކަން ބޮޑުނުވީސްކަމަށެވެ.
ރާއްޖޭގައި އެކި ނަންނަމުގައި ގޭންގުތައް ހިންގަމުން އާދެއެވެ. އަދި ދޭތެރެ ދޭތެރެއިން ގުރޫޕް މާރާމާރީތައް ހިންގާ ބައެއް މީހުން ފުރާނަވެސް ވަނީ ގެއްލުވާލާފައެވެ.
ފުލުހުން ކުރިން އާއްމުކުރި މައުލޫމާތުތަކަށް ބަލާއިރު ގޭންގުތަކުގައި ގިނައިން އުޅެމުން ދަނީ 18 އަހަރުން ދަށުގެ ކުޑަކުދިންނެވެ. އެހެންކަމުން ޖިނާއީ ކުށުގެ ޒިންމާ ނަގަންޖެހޭ އުމުރު 12 އަހަރަށް ތިރިކުރުމަށް ސަރުކާރުން ވަނީ ނިންމާފައެވެ.
