ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާއި މޯލްޑިވްސް ސޮކަރ މޭޓްސް (އެމްއެސްއެމް) ގުޅިގެން ބާއްވާ ދިވެހި ޔޫތު ލީގު 2024 ގައި 12 އަހަރުން ދަށާއި، 14 އަހަރުން ދަށާއި، 16 އަހަރުން ދަށުގެ އުމުރުފުރާގެ ކޮންމެ އޭޖް ގުރޫޕަކުން ޖުމްލަ އަށް ޓީމު ވާދަކުރާނެއެވެ. މި މުބާރާތް ކުރިޔަށްދާނީ ހެންވޭރު ދަނޑާއި، ހުޅުމާލެ ސްޓޭޑިއަމް އަދި ގަލޮޅު ދަނޑުގައެވެ.
މި މުބާރާތުގައި ވާދަކުރާނީ ޔޫވީ އާއި، ޓީސީ ސްޕޯޓްސް ކުލަބާއި، ކުލަބް ވެލެންސިއާ އާއި، ވިކްޓަރީ ސްޕޯޓްސް ކުލަބާއި، ކުލަބު އީގަލްސް އާއި، މާޒިޔާ ސްޕޯޓްސް އެންޑް ރެކްރިއޭޝަނާއި، ސުޕަ ޔުނައިޓެޑް ސްޕޯޓްސް (ސަސް) އަދި ހުއްރިއްޔާ ސްޕޯޓްސް ކުލަބެވެ. ދިވެހި ޔޫތު ލީގު ކުރިއަށްދާނީ މި މަހުގެ 21 އިން އަންނަ އަހަރުގެ ޖެނުއަރީ މަހުގެ އެއްވަނަ ދުވަހުގެ ނިޔަލަށެވެ.
މުބާރާތުގެ ފުރަތަމަ މެޗުގައި އަންނަ ބުރާސްފަތި ދުވަހުގެ ހަވީރު 15:45 ގައި ބައްދަލުކުރާނީ ޔުނައިޑެޓް ވިކްޓަރީ (ޔޫވީ) އާއި ޓީސީ ސްޕޯޓްސް ކުލަބުގެ 12 އަހަރުން ދަށުގެ ޓީމެވެ. މުބާރާތުގެ 14 އަހަރުން ދަށުގެ ފުރަތަމަ މެޗު އޮންނާނީ ހަމަ އެ ދުވަހު 17:00 ގައި ހެންވޭރު ދަނޑުގައެވެ. އެ މެޗުގައި ބައްދަލުކުރާނީ ޔޫވީ އާއި ޓީސީ ސްޕޯޓްސް ކުލަބެވެ.
