ޕީއެންސީން މިއަދު ނެރުނު ބަޔާނެއްގައި ބުނީ ފާއިތުވި އެއް އަހަރު ދުވަހު ރައީސް ޑރ. މުހައްމަދު މުއިއްޒުގެ ސަރުކާރު ހިންގާފައިވަނީ ޒިންމާދާރުކަމާ އެކު މާލިއްޔަތަށް އަމާނާތްތެރިވެ، ހާމަކަންބޮޑުކޮށް ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށެވެ.
އެގޮތުން ފާއިތުވި އަހަރު ތެރޭ 70 އަށް ވުރެ ގިނަ ނޫސްވެރިންގެ ބައްދަލުވުން ބޭއްވި ކަމަށާއި، 700 އަށްވުރެ ގިނަ ފަހަރު ސަރުކާރުގެ ވަޒީރުން އެކި މީޑިއާތަކަށް މައުލޫމާތު ދީފައިވާ ކަމަށް ޕީއެންސީން ބުނެ އެވެ. އެ މުއްދަތުގައި އެއްވެސް މީޑިއާއަކަށް ފިޔަވަޅު އަޅައި ދަތި ކުރުމަށް ސަރުކާރުން އެއްވެސް ކަމެއް ކޮށްފައި ނުވާނެ ކަމަށްވެސް ބުނެފައިވެ އެވެ.
އަދި އާރްޓީއައި ތަކަށް ޖަވާބުދިނުމުގައި މި ސަރުކާރުން ކުރީ ސަރުކާރުން ފަދައިން އިހުމާލުވެފައި ނުވާނެކަމަށާއި، އެކަން ތަފާސްހިސާބުތަކުން ފެންނަން އޮންނާނެ ކަމަށްވެސް ޕީއެންސީ އިން ވަނީ ބުނެފަ އެވެ.
އެގޮތުން ފާއިތުވި ސަރުކާރުން ދައުލަތުގެ ކުންފުނިތަކުން އެއްވެސް އާރުޓީއައި އަކަށް ޖަވާބު ނުދޭ ކަމަށާއި، ޖަވާބުދޭން ޖެހޭ ކަމަށް ކޯޓުތަކުން ކަނޑައެޅުމުންވެސް ޖަވާބު ނުދީ ހިފަހައްޓާފައި އޮތް ކަމަށް ޕީއެންސީ އިން ވަނީ ބުނެފަ އެވެ. ޕީއެންސީ އިން ބުނީ އެ ސިޔާސަތު ނިމުމަކަށް ގެންނެވީ ރައީސް މުއިއްޒު ކަމަށެވެ.
ފާއިތުވި ތިން އަހަރު ދައުލަތުގެ ހަރަދުތައް އެވަރެޖުކޮށް އަހަރަކަށް 15 ޕަސަންޓު އިތުރުވަމުންދިޔަ ނަމަވެސް މި އަހަރު ދައުލަތުގެ ހަރަދުތައް އިތުރުވީ 2.5 ޕަސަންޓު ކަމަށް އެ ބަޔާނުގައިވެ އެވެ.
ހަރަދުކުޑަ ކުރުމުގެ ނަތީޖާއެއްގެ ގޮތުން ބަޖެޓުގެ ޑެފިސިޓު ކުޑަކުރެވިފައިވާކަމާއި ޖުމްލަ ބަޖެޓު ޑެފިސިޓު 378 މިލިއަން ރުފިޔާއިން ކުޑަކުރެވިފައިވާކަން ވެސް އެ ބަޔާނުގައި އޮތީ ފާހަގަ ކޮށްފަ އެވެ.
ޕީއެންސީން އެހެން ބުނި ނަމަވެސް، އާރްޓީއައިތަކަށް އެކަށީގެންވާ އިޖާބައެއް ސަރުކާރުން ނުދޭތީ އެކަމާ އިންފޮމޭޝަން ކޮމިޝަނަރުގެ އޮފީހުން ވަނީ މީގެ ކުރިން ކަންބޮޑުވުންތަކެއް ވެސް ފާޅުކޮށްފަ އެވެ.
