ގާސިމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އޭނާގެ ފޮޓޯ އާއި ވީޑިއޯ ބޭނުންކޮށްގެން އާޓިފިޝަލް އިންޓެލިޖެންސް (އޭއައި) މެދުވެރިކޮށް ސްކޭމެއް ހިންގަމުންދާ ކަމަށެވެ. މި ސްކޭމްގައި ބުނަނީ އިންވެސްޓްކޮށްގެން އަވަހަށް ފައިދާ ލިބޭނެ ކަމަށާއި، ގައުމީ ބޭންކު މެދުވެރިވެގެން އެ ފައިދާ ލިބޭނެ ކަމަށެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކީ ގާސިމް ޓީވީ ޗެނަލަކަށް ދެއްވި އިންޓަވިއުއެއް ބަދަލުކޮށްގެން ހަދާފައިވާ އެއްޗެކެވެ. އިނގިރޭސި ބަހުން އަޑު އަޅާފައިވާ އެ ވީޑިއޯގައި ގާސިމް ކަމަށް ދައްކުވައިދޭން އުޅޭ މީހާ ބުނަނީ އޭނާގެ ފަސް ބިލިއަން ޑޮލަރު އެކަމުގައި އިންވެސްޓްކޮށްފައިވާ ކަމަށެވެ.
ގާސިމް ވިދާޅުވީ މިއީ ރައްޔިތުންނަށް އޮޅުވާލައި، ޒަމާނީކޮށް ސްކޭމް ކުރުމުގެ ބޭނުމުގައި ހިންގަމުންދާ ދަށު ދަރަޖައިގެ އަމަލުތަކެއް ކަމަށެވެ. އަދި މި ސްކޭމްގައި ނުޖެހުމަށާއި މިފަދަ ވީޑިއޯތައް ސޯޝަލް މީޑިއާގައި ދައުރު ނުކުރުމަށް އެދިވަޑައިގެންފައި ވެއެވެ.
- ގާސިމްގެ އިންޓަވިއުއެއް ބަދަލުކޮށްގެން އިނގިރޭސި ބަހުން ވީޑިއޯއެއް ހަދާފައިވޭ
- ވީޑިއޯގައި ބުނަނީ ގާސިމް ފަސް ބިލިއަން ޑޮލަރު އިންވެސްޓްކޮށްފައިވާ ކަމަށް
- ގާސިމް ވަނީ މި ސްކޭމްގައި ނުޖެހުމަށް އާންމުންނަށް އިންޒާރުދީފަ
