އެޗްޓީއެމްއެލް، ސީއެސްއެސް އަދި ޖާވާސްކްރިޕްޓް ބޭނުންކޮށްގެން ކޯޑިންގްގެ ހުނަރު ދަސްކޮށްދޭ މި ޕްރޮގްރާމަކީ އަންހެން ކުދިން ބާރުވެރިކުރުވުމުގެ މަގްސަދުގައި ކުރިއަށްގެންދާ ޕްރޮގްރާމެކެވެ.
ގާލްސް ޓު ކޯޑް ހއ.ދިއްދޫ އެޑިޝަން ފަރުމާކޮށްފައިވަނީ 10 އަހަރާއި 13 އަހަރުގެ ދެމެދުގެ އަންހެން ކުދިންނަށް، ޓެކްނޮލޮޖީގެ ދާއިރާއިން ފުރުސަތު ހޯދުމަށް ޝައުގުވެރިކަން އުފައްދާ މި ދާއިރާގައި އަންހެންކުދިންގެ ބައިވެރިވުން އިތުރުކުރުމަށެވެ. މި ޕްރޮގްރާމްގައި އިސްކަންދީފައި ވަނީ ކުރިން ކޯޑިންގްގެ ތަޖުރިބާ ނެތް ކުދިންނަށެވެ. ދެމަސް ދުވަހަށް ކުރިއަށްގެންދެވުނު ގާލްސް ޓު ކޯޑް ހއ. ދިއްދޫ ޕްރޮގްރާމް މެދުވެރިކޮށް 20 ކުދިން ވަނީ ޕްރޮގްރާމް ކާމިޔާބުކަމާ އެކީ ނިންމާފައެވެ. އަދި މި ޕްރޮގްރާމް ނިމުނުއިރު ބައިވެރިންގެ އަމަލީ ހުނަރުތައް ތަރައްގީވެ، އަމިއްލައަށް ވެބްސައިޓް ފަރުމާކޮށް ޑިވެލޮޕްކުރަން ދަސްކޮށްދެވުނެވެ.
ވިމެން އިން ޓެކް މޯލްޑިވްސްގެ ރައީސް، ނަހުޒާ އިބްރާހިމް ވިދާޅުވިގޮތުގައި ޒުވާން އަންހެން ކުދިން މިހާ ޖޯޝާ އެކީ ކޯޑިންގްއަށް ޝައުގުވެރިކަން ފާޅުކުރާކަމަކީ ވަރަށް ބޮޑު އުފަލެކެވެ. އެކުދިން އަޅުގަނޑުމެންނަށް ދައްކުވަމުން އެދަނީ ރަނގަޅު ފުރުސަތުތަކާ އެއްބާރުލުމާ އެކު، އެކުދިންނަށް ކޮންމެ ކަމެއް ވެސް ހާސިލްކުރެވިދާނެ ކަމެވެ. އަޅުގަނޑުމެން އުންމީދު ކުރަނީ މި ޕްރޮގްރާމްގެ ސަބަބުން އެކުދިންނަށް ފަންނީ ހުނަރުތައް ލިބިގެން ދިއުމާއި އެކު، އުއްމީދީ މުސްތަގުބަލެއް ބިނާ ކުރުމަށް މަގު ފަހިވެގެންދާނެކަމަށެވެ.
ވިމެން އިން ޓެކް މޯލްޑިވްސްއާ ގުޅިގެން ދިރާގުން ކުރިއަށް ގެންދާ ގަރލްސް ޓު ކޯޑް ޕްރޮގްރާމަކީ ދިރާގުގެ ސީ.އެސް.އާރު ޕްރޮގްރާމްގެ ތެރެއިން އަންހެނުން ބާރުވެރިކުރުވުމަށް އެކުންފުނިން ކުރާ މަސައްކަތުގެ މުހިންމު ބައެކެވެ. އަދި މިޕްރޮގްރާމް ވަނީ ހއ. ދިއްދޫގެ އިތުރުން ފުވައްމުލައް ސިޓީ، ގދ. ތިނަދޫ، ކުޅުދުއްފުށި ސިޓީ އަދި ލާމު އަތޮޅުގައި ކުރިއަށް ގެންގޮސްފައެވެ.
