އިސްލާމިކް މިނިސްޓްރީން މަރުކަޒު މުންނާރު ކައިރީގައި އޮތް މަސްފެންގަނޑު ހަދަން ނިންމީ މަރުކަޒަށް 40 އަހަރުފުރޭ މުނާސަބަތާއި ދިމާކޮށެވެ. މި މަސައްކަތް ކުރަން ފުރަތަމަ މިނިސްޓްރީން ނިންމީ ބިޑްގެ އުސޫލުން ބަޔަކާއި ހަވާލުކޮށްގެންނެވެ. އެހެންނަމަވެސް އިގްތިސާދީ ހާލުތު އޮތްގޮތުން އެކަން ނުކުރުމަށް މިނިސްޓްރީން ނިންމުމުން ސްޓެލްކޯއިން ވަނީ އެކުންފުނީގެ ސީއެސްއާރުގެ ދަށުން އެ މަސައްކަތް ކޮށްދޭން ޝައުގުވެރިކަން ފާޅުކޮށްފައެވެ.
މަރާމާތަށް ފަހު މަރުކަޒު މަސްފެންގަނޑު
އިސްލާމީ މަރުކަޒު މުންނާރު ތިރީގައި ހަދާ މަސްފެންގަނޑު މަރާމާތުކުރުމުގެ އަމަލީ މަސައްކަތް ސްޓެލްކޯއިން ފެށި މިދިޔަ މަހުގެ 14 ގައެވެ. މި މަސައްކަތް ކުރީ އެ ކުންފުނީގެ މުވައްޒަފުންނެވެ.
މަސްފެންގަނޑުގެ މަސައްކަތް ނިންމާ ސްޓެލްކޯއިން ވަނީ މިއަދު އިސްލާމިކް މިނިސްޓްރީއާ ހަވާލުކޮށްފައެވެ. މަސައްކަތް ނިންމާ ހަވާލުކުރީ މަސްފެންގަނޑަށް ބޭނުންވާ މަސްތައްވެސް އެ ފެންގަނޑަށް ލުމަށްފަހުއެވެ.
މަސްފެންގަނޑުގެ މަސައްކަތް ނިންމާ އެތަން މިނިސްޓްރީއާ ހަވާލުކޮށްދެއްވީ ސްޓެލެކޯގެ މެނޭޖިން ޑިރެކްޓްރު ހުސެއިން ފަހުމީއެވެ. މަސްފެންގަނޑާއި ހަވާލުވެޑައިގަތީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.
މަސްފެންގަނޑުގެ މަސައްކަތް ނިންމާ ސްޓެލްކޯއިން އިސްލާމިކް މިނިސްޓްރީއާ ހަވާލުކުރަނީ
ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވީ އިސްލާމީ މަރުކަޒުގެ މުންނާރުގެ ދަށުގައިވާ މަސްފެންގަނޑު ހެދުމަށް ޝައުގުވެރިކަން ފާޅުކުރީ އެތަނަކީ ތާރީހީ މުހިންމުކަމެއް ލިބިފައިވާ ތަނެއްކަށްވުމުންކަމަށެވެ. އަދި އެ ހާއްސަކަން އެ ގޮތުގައި ބޭއްވުމަށް އެ މަސްފެންގަނޑު އަލުން ރީތިކޮށް އެންމެންގެ ލޯބި ލިބޭތަނަކަށް އެތަން ހެދުމަކީ އެ ކުންފުނީގެ ޝައުގެއްކަން ފަހުމީ ފާހަގަކުރެއްވިއެވެ.
މަރާމާތަށް ފަހު މަރުކަޒު މަސްފެންގަނޑު
އިސްލާމީ މަރުކަޒަކީ އިސްލާމީ އެކި ގައުމުތަކުގެ އެހީގައި 1980ގެ ކުރީކޮޅު އަޅަން ފެށި މަރުކަޒެކެވެ. މިސްކިތުގެ މަސައްކަތް 10 މަސް ދުވަހުގެ ތެރޭގައި ނިންމާ ރަސްމީކޮށް މިސްކިތް ހުޅުވީ ނޮވެމްބަރު 1984ގެ ނޮވެމްބަރުމަހުގެ 11 ވަނަދުވަހު ރީގެ ރައީސް މައުމޫން އަބްދުލްގައްޔޫމެވެ.
އިސްލާމީ މަރުކަޒު އިމާރާަތްކޮށްފައިވަނީ މެލޭޝިއާގެ ވެރިރަށް ކުއާލަ ލަމްޕޫރުގެ ބަންގްސާގައި ހުންނަ މިސްކިތެއް ނަމޫނާއަކަށް ބަލައިގެން އެތަނާއި އެއްގޮތަށެވެ. މަރުކަޒުގެ ޑިޒައިންވެސް ކުރެހީ އެ މިސްކިތް ކުރެހި އާކިޓެކްޓެކެވެ.
