ފުނަދޫގައި ހުރި ތެޔޮ ޓޭންކުތައް އެތަނުން ނަގާ ސަރުކާރުން ކުރިން ނިންމީ މި އަތޮޅު މާގިރިފަޅަށް ބަދަލުކުރާށެވެ. އެހެންނަމަވެސް މާގިރިފަޅު ހިއްކުމުގެ ކުރިން ހެދުނު އެންވަޔަރަންމަންޓަލް އިމްޕެކްޓް އެސެސްމަންޓް (އީއައިއޭ) ގެ ނަތީޖާއަށް ބެލުމަށްފަގު އެ ފިއުލް ފާމް ތިލަފުއްޓަށް ބަދަލުކުރަން ވަނީ ނިންމާފައެވެ. އީއައިއޭ ރިޕޯޓުން ދެއްކީ މާގިރިފަޅަކީ ފުން ސަރަހައްދަކަށް ވުމާއެކު، އެތަން ހިއްކައިފިނަމަ އެ ސަރަހައްދުގެ ތިމާވެއްޓަށް ނޭދެވޭ އަސަރުތަކެއް ކުރާނެ ކަމަށެވެ.
ދައުލަތުގެ މީޑިއާގައި ވާހަކަ ދައްވަމުން އެސްޓީއޯގެ މޭނޭޖިން ޑިރެކްޓަރު ޝިމާދު އިބްރާހިމް ވިދާޅުވީ ފުނަދޫ ފިއުލް ފާމް ބަދަލުކުރަން ތިލަފުށިން ލިބިފއިވާ ބިމަކީ ފުނަދޫ ބަނދަރަށްވުރެއްވެސް ބޮޑު ބަނދަރެއް ހެދޭ ވަރުގެ ބިމެއްކަމަށެވެ. އެހެންކަމުން އެ މަސައްކަތް ފެށުމަށް ކުރަންޖެހޭ ކަންކަން ކުރަމުން އަންނަކަމަށް ޝިމާދު ވިދާޅުވިއެވެ.
ޝިމާދް ވިދާޅުވީ ފިއުލް ފާމް ތިލަފުއްޓަށް ބަދަލުކުރުމަށްޓަކައި ކޮންސަލްޓެންޓެއް ނަގައިގެން، ކޮންސެޕްޓާއި ޑިޒައިންގެ މަސައްކަތް ކުރަމުން އަންނަކަމަށެވެ. އެކަން ނިމުމުން މަޝްރޫއުގެ އަމަލީ މަސައްކަތް ކުރާނެ ބަޔަކު ހޯދަން އިއުލާންކުރާނެކަމަށްވެސް ޝިމާދު ވިދާޅުވިއެވެ. އަދި އެ މަޝްރޫއު އަމަލީ މަސައްކަތް ފެށުމުން މަސައްކަތް އެއްކޮށް ނިންމަން 18 މަހާއި 24 މަހާ ދެމެދުގެ މުއްދަތެއް ނަގާނެ ކަމަށް ޝިމާދު ވިދާޅުވިއެވެ.
ފުނަދޫ ހުސްކުރުމަކީ ރައީސް ޑރ. މުހައްމަދު މުއިއްޒުގެ ސަރުކާރުން ކުރިން ނިންމާފައިވާ ކަމެކެވެ. މި ނިންމުމުގެ ބޭނުމަކީ ވެލާނާ އިންޓަނޭޝަނަލް އެއާޕޯޓް ތަރައްގީކުރުމުގެ ތިންވަނަ ފިޔަވަހީގެ ދަށުން ފުނަދޫގައި ބައިނަލްއަގުވާމީ ފައިނޭންޝަލް ސެންޓަރެއް ހިމެނޭ ސްޕެޝަލް އިކޮނޮމިކް ޒޯނެއް ތަރައްގީކުރުމެވެ. މި މަޝްރޫއުގެ ދަށުން މާލެ، ފުނަދޫ، ހުޅުލެ އަދި ހުޅުމާލެ ގުޅުވައިދޭ ބްރިޖުތަކެއް އެޅުމަށްވެސް ވަނީ ރޭވިފައެވެ.
