ހުޅުމާލޭގެ ބެލެނިވެރި ފަރާތް، ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ން މިއަދު ކުރި އިއުލާނެއްގައިވަނީ، ދޫކުރުމަށް ހަމަޖެހިފައިވާ 154 ޕާކިން ޖާގައިގެ ތެރެއިން 76 ޖާގަ ދޫކުރަނީ ވިނަރެސް އިމާރާތުގެ ތެރެއިން ކަމަށެވެ. ބާކީ 78 ޖާގަ ދޫކުރަނީ އިމާރާތުގެ ބޭރުންނެވެ. މި ހުރިހާ ޖާގައެއް ވެސް ދޫކުރުމަށް ހަމަޖެހިފައިވަނީ ކާރު ރެޖިސްޓްރީ ކުރުމުގެ ހުއްދައާ ވެސް އެކުގައި ކަމަށް އެޗްޑީސީންވަނީ އިއުލާންކޮށްފައެވެ.
ޕާކިން ޖާގައަށް އެދި ހުށަހެޅުމުގެ ޝަރުތުތަކުގެ ތެރޭގައި ހިމެނެނީ:
- ވިނަރެސް މަޝްރޫއިން ފްލެޓު ގަތުމުގެ އެއްބަސްވުމުގައި ސޮއިކޮށްފައިވާ މައި-އެޕްލިކަންޓް ކަމުގައިވުން
- ޑިސެންބަރު ފަހެއްގެ ނިޔަލަށް އެޗްޑީސީއަށް އެއްވެސް ފައިސާއެއް ދައްކަންޖެހި، އެ ފައިސާ ނުދައްކައިވާ ފަރާތެއް ކަމުގައިނުވުން
އެޗްޑީސީން އިއުލާންކޮށްފައިވާ ގޮތުން ކޮންމެ ފަރާތަކަށް ވެސް ދޫކުރެވޭނީ އެންމެ ޕާކިން ޖާގައެކެވެ. އަދި އެ ޖާގަ ހަމަޖެހޭނީ ފްލެޓު އެއްބަސްވުމުގެ ދަށުން ދޫކުރެވޭ ޖާގައެއްގެ ގޮތުގަ އެވެ.
އެޗްޑީސީން ބުނީ، މިކަމަށް ޝައުގުވެރިވާ މީހުން، ބީލަމުގެ އުސޫލުން ކާރު ޕާކިންގ ޖާގަ ގަތުމަށް ނުވަތަ ކުއްޔަށް ހިފުމަށް އެދި ހުށަޅާނީ އޮންލައިން ޕޯޓަލް މެދުވެރިކޮށް ކަމަށެވެ.
މި ފުރުސަތު މިއަދުން ފެށިގެން ޑިސެމްބަރު މަހުގެ ފަސް ވަނަ ދުވަހުގެ ނިޔަލަށް އެޗްޑީސީން ވަނީ ހުޅުވާލައިފަ އެވެ. މި ޕާކިން ޖާގަތަކުގެ ލޭއައުޓް ފޯމެޓާއި ބިޑް ސެކިއުރިޓީ ފޯމެޓުގެ އިތުރަށް، މި ކަމާ ގުޅޭ މައުލޫމާތު އެޗްޑީސީގެ ވެބްސައިޓުގައި ވަނީ އާންމުކޮށްފައެވެ.
