ޗެމްޕިއަންސް ލީގުގައި ބާސެލޯނާ ރޭ ކުޅުނީ ފްރާންސްގެ ބްރެސްޓާ ދެކޮޅަށެވެ. މި މެޗުގައި ބާސެލޯނާއިން ބްރެސްޓްގެ ގޯލު ހުޅުވާލާފައިވަނީ މެޗުގެ 10 ވަނަ މިނިޓުގައި އެ ޓީމަށް ލިބުނު ޕެނަލްޓީއަކުން ރޮބަޓް ލެވަންޑޯސްކީ ކާމިޔާބުކޮށްދިން ލަނޑާއެކުގަ އެވެ. މިއީ ޗެމްޕިއަންސް ލީގުގައި އޭނާ ޖެހި 100 ވަނަ ލަނޑެވެ. މި ލަނޑާއެކު ލެވަންޑޯސްކީ ވެފައިވަނީ ޗެމްޕިއަންސް ލީގުގައި 100 ގޯލު ޖެހި ތިންވަނަ ކުޅުންތެރިޔާ އަށެވެ.
ޗެމްޕިއަންސް ލީގުގެ ތާރީޚުގައި އެންމެ ގިނަ ލަނޑު ޖަހާފައިވާ ކްރިސްޓިއާނޯ ރޮނާލްޑޯ ވަނީ 141 ލަނޑު ޖަހާފަ އެވެ. އަދި އޭނާ އާއި އެންމެ ވާދަވެރި ލިއޮނެލް މެސީ ވަނީ 129 ލަނޑު ޖަހާފަ އެވެ.
ރޭގެ މެޗުން ބާސާ މޮޅުވީ ތިން ލަނޑު ސުން ލަނޑުންނެވެ. މި ނަތީޖާއާއެކު ތާވަލުގެ ދެވަނައަށް ބާސެލޯނާވަނީ އަރާފައެވެ. ބާސެލޯނާގެ އޮލިމްޕިކްސް ސްޓޭޑިއަމްގައި ކުޅުނު މި މެޗާއެކު ޗެމްޕިއަންސް ލީގުގައި މި ސީޒަނުގައި ބާސެލޯނާ ކުޅުނު ފަސް މެޗުން އެ ޓީމު ވަނީ 12 ޕޮއިންޓް ހަމަކޮށްފައެވެ.
