އިލެކްޝަން ކޮމިޝަންގެ މެމްބަރުކަމަށް ކުރިމަތިލުމަށް ރައީސް އޮފީހުން މި ހުޅުވާލީ އެ ކޮމިޝަންގެ ނައިބު ރައީސްގެ މަގާމުގައި ހުންނެވި އަލީ ނަޝާތާއި އެ ކޮމިޝަނުގެ މެމްބަރު މުހައްމަދު އާސިފް މަގާމުން ވަކިކުރަން ރައްޔިތުން މަޖިލީހުން މިދިޔަ ހޯމަދުވަހު ނިންމުމުންނެވެ.
ރައީސް އޮފީހުން ބުނީ އިލެކްޝަންސް ކޮމިޝަންގެ މެންބަރުކަމަށް އެދި ހުށަހެޅުމުގެ ފުރުސަތު އަންނަ މަހުގެ 5ގެ ނިޔަލަށް ހުޅުވާލާފައިވާކަަމަށެވެ. އިލެކްޝަންސް ކޮމިޝަންގެ މެންބަރުކަމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން 12:00 އަށްކަމަށްވެސް ރައީސް އޮފީހުން ބުނެއެވެ.
ނަޝާތާއި އާސިފު މަގާމުން ވަކިކުރުމުން އިލެކްޝަން ކޮމިޝަންގެ ވަނީ ގާނޫނީ ހުސްކަމެއްގެ ތެރޭގައެވެ. ސަބަބަކީ ކޮމިޝަންގައި މިވަގުތު ތިއްބެވީ އެންމެ ދެ މެމްބަރުންނަށް ވުމެވެ. އެއީ މެންބަރު ޑރ. މުހައްމަދު ޒާހިރު އާއި މެންބަރު ހަސަން ޒަކަރިއްޔާއެވެ. ކޮމިޝަންގެ ރައީސަކަށް ހުންނެވި ފުއާދު ތައުފީގު ދައުރު މިދިޔަ ހޯމަދުވަހު ހަމަވިނަމަވެސް އެ މަގާމަށްވެސް އަދި މެމްބަރަކު އައްޔަންކޮށްފައެއް ނުވެއެވެ.
