މިފަދައިން މަރުކަޒީ ބޭންކުން ބުނީ މިހާރު އެކުލަވައިލާ އަމަލުކުރަން ފަށާފައިވާ މަނީ އެކްސްޗޭންޖު ގަވާއިދަށް ގާނޫނެއްގެ ބާރު ދިނުމަށް އެ އޮތޯރިޓީން އެކުލަވައިލާފައިވާ ބިލާ ގުޅޭ ގޮތުން ނޫސްވެރިންނަށް މައުލޫމާތު ދިނުމަށް މިއަދު ބޭއްވި ނޫސް ކޮންފަރެންސްގަ އެވެ.
މުނައްވަރު މިހެން ވިދާޅުވެފައި މިވަނީ "ބޭރު ފައިސާއާ ބެހޭ ބިލް"ގެ ނަމުގައި ބިލެއް އެކުލަވާލާ އާންމުންގެ ހިޔާލަށް ހުޅުވާލުމުން އެ ބިލް، ގާނޫނަކަށް ވުމުން ޑޮލަރު މާރުކުރަން މަޖުބޫރުކުރުމަށް މިހާރު ހަދާފައިވާ ގަވައިދުގެ ތެރެއިން ޑޮލަރު މާރުކުރުމަށް ލުއިތަކެއް ލިބިގެންދާ ކަމަށް ބުނެ ބައެއް ނޫސްތަކުގައި މިއަދު ރިޕޯޓްކުރުމާ ގުޅިގެންނެވެ.
މުނައްވަރު ވިދާޅުވީ ބޭރު ފައިސާ މާރުކުރުން ނުވަތަ ފޮރިން އެކްސްޗޭންޖުގެ ގާނޫނެއް ނެތުމުގެ ސަބަބުން އެމްއެމްއޭގެ އަތް އޮތީ ބަނދެވިފައިކަމަށެވެ. ފޮރިން އެކްސްޗޭންޖު މާކެޓުގައި އެމްއެމްއޭއަށް މާބޮޑު ބާރުތަކެއް ނެތްކަން ފާހަގަކުރައްވަމުން ވަނީ، އެފަދަ ގާނޫނެއް އެކުލަވާލުމުގެ މަސައްކަތްކުރަނީ ފޮރިން އެކްސްޗޭންޖު މާކެޓުގައި ބޭންކުތަކަށް ޑޮލަރު ވަންނަ މިންވަރު ވަރަށް ބޮޑަށް ދަށްވެފައި ހުރުމުންކަމަށްވެސް ގަވަރުނަރު ވިދާޅުވި އެވެ.
ގަވަރުނަރު ވިދާޅުވީ ބޭރު ފައިސާއާއި ބެހޭ ޤާނޫނެއް އެކުލަވާލުމަކީ މިވަގުތަށް ކޮންމެހެން މުހިންމުކަމެއްކަމަށެވެ. އެހެނީ ރައްޔިތުން ބޭނުންކުރާ ބޭންކު ކާޑުގެ ހިދުމަތް ހުއްޓެން ބޭނުންނުވާތިއާއި، ބޭރުގައި ކިޔަވާ ކުދިންނަށްވެސް ޑޮލަރު ބޭނުންވާތީކަމަށް ގަވަރުނަރު ވިދާޅުވި އެވެ. މި ގާނޫނު އެކުލަވާލުމަށް ބިލު އެކުލަވާލުމުގެ މަސައްކަތް މީގެ ކުރިން ތިން ގަވަރުނަރުންވެސް ކުރެއްވިކަމަަށެވެ.
ބިލް އެކުލަވާލާފައިވަނީ ޑޮލަރު މާރުކުރަން ލާޒިމުވާ ޖުމްލަ އަދަދުގެ 0.05 ޕަސެންޓާއި 0.10 ޕަސަންޓާ ދެމެދުގެ އަދަދަކުން ޖޫރިމަނާ ކުރުމާއި މާރުކުރަންޖެހޭ ދުވަހުގެ އިތުރަށް ހިނގާ ކޮންމެ ދުވަހަކަށް ވެސް ޖޫރިމަނާ ހިނގާ ގޮތަށެވެ.
ގަވަރުނަރު ވިދާޅުވީ، ރާއްޖޭގެ ޓޫރިޒަމް ދާއިރާއަށް އަހަރަކު ހަތަރު ބިލިއަން ޑޮލަރު ވަންނަ އިރު، ދައުލަތުގެ ރިޒާވް އިތުރު ނުވަނީ ކީއްވެތޯ އެތައް ބަޔަކު ސުވާލުކުރާ ކަމަށެވެ.
މުނައްވަރު ވިދާޅުވީ ގަވައިދުގައިވާ ގޮތަށް ޑޮލަރު މާރުކުރުމުގެ ކަންކަން ކުރިއަށް ގޮސްފިނަމަ ރައީސް ޑރ. މުހައްމަދު މުއިއްޒު ވިދާޅުވި ގޮތަށް އެކި ބޭނުންތަކަށް މިހާރު އާންމުންނާއި ވިޔަފާރިވެރިންނަށް ލިބޭ ޑޮލަރުގެ ނިސްބަތް އިތުރުކުރެވި ކަޅު ބާޒާރުން ޑޮލަރު ހޯދަންޖެހޭ މައްސަލައަށް ލުއިތަކެއް ލިބޭނެ ކަމަށެވެ.
އިތުރަށް ގަވަނަރު ފާހަގަކުރެއްވީ މިހާރު ގަވާއިދު އަދި އަލަށް އެކުލަވައިލި ބިލުގައިވެސް އޮންނަ ގޮތުން ރިސޯޓުތަކުން ޑޮލަރު މާރުކުރަންޖެހެނީ އެ މަހެއްގައި ލިބޭ އާމްދަނީން އެކަންޏެއް ނޫނެވެ. މާރުކުރަންޖެހެނީ އެ މަސް އަދި ޖެހިގެން އަންނަ ތިން މަސް އެއްކޮށް ޖުމްލަ ހަތަރު މަހުން ލިބޭ އާމްދަނީގެ ތެރެއިން ކަމަށް ގަވަނަރު ވިދާޅުވި އެވެ.
އަދި ޓުއަރިސްޓުން ރާއްޖޭގައި އެވެރެޖުކޮށް ހޭދަކުރާ ފައިސާގެ އަދަދަށް ބަލާއިރު އާންމުކޮށް ކޮންމެ ޓޫރިސްޓަކުވެސް ރާއްޖޭގައި އެވެރެޖުކޮށް ހާހަކަށްވުރެ ގިނަ ޑޮލަރު ހޭދަކުރާކަމަށް ގަވަނަރު ވިދާޅުވި އެވެ.
މިހާރު އެމްއެމްއޭއިން އެކުލަވައިލައިފައިވާ ބިލުގައި ވަނީ، ބޭރު ފައިސާ ދިވެހި ބޭންކަކަށް ޖަމާނުކުރާނަމަ، އެ ފަރާތަކުން އެ މަހަކަށް ޖަމާކުރަން ޖެހޭ ބޭރު ފައިސާގެ 0.05 ޕަސެންޓުން ޖޫރިމަނާ ކުރުމުގެ ބާރު އެމްއެމްއޭއަށް ލިބޭ ކަމަށެވެ. އަދި ގާނޫނާ އެއްގޮތަށް އަމަލުކުރަން ދެން ހިނގާ ކޮންމެ ދުވަހަކަށް، ޖަމާކުރަން ޖެހޭ ބޭރު ފައިސާގެ 0.05 ޕަސެންޓަށްވުރެ އިތުރުނުވާނެހެން ފައިސާ ދައްކަން އެންގޭނެ ކަމަށެވެ.
މީގެ އިތުރުން ޑޮލަރު މާރުނުކުރާނަމަ، އެ ފަރާތަކުން އެ މަހަކަށް ޖަމާކުރަން ޖެހޭ ފައިސާގެ 0.1 ޕަސެންޓުން ޖޫރިމަނާ ކުރެވޭނެ އެވެ. އަދި ގާނޫނާ އެއްގޮތަށް ޑޮލަރު މާރުކުރަން ދެން ހޭދަވާ ކޮންމެ ދުވަހަކަށް، އެ މަހަކަށް ޖަމާކުރަން ޖެހޭ ބޭރު ފައިސާގެ 0.1 ޕަސެންޓަށް ވުރެ އިތުރުނުވާނެ އަދަދެއް ދެއްކުމުގެ ބާރު ވެސް އެމްއެމްއޭއަށް އެ ބިލުން ލިބިދެ އެވެ.
އެމްއެމްއޭއިން މި ބަދަލުތަކާއެކު ބިލެއް އެކުލަވައިލީ، ބޮޑު އާމްދަނީއެއް ލިބޭ ލަގްޒަރީ ރިސޯޓުތައް ފަދަ ތަންތަނުން ގަވައިދަށް އަމަލުނުކުރާނަމަ ޖޫރިމަނާ ކުރެވެނީ އެއް މިލިއަން ރުފިޔާއިން ކަމަށްވާނަމަ، އެއީ މާ ކުޑަ އަދަދެއް ކަމަށް ބުނެ ގަވައިދަށް ފާޑު ކިޔުން އަމާޒުވެފައި ވަނިކޮށެވެ.
އެމްއެމްއޭއިން ވަނީ މި ބިލުގެ ޑްރާފްޓެއް ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ފޮނުވައިފައިވާނެ ކަމަށާއި އާންމުންގެ ހިޔާލު އަންނަ އާދިއްތަ ދުވަހުގެ ނިޔަލަށް ހުށަހެޅޭނެ ކަމަށް ބުނެފަ އެވެ.
އެމްއެމްއޭއިން އާންމުކުރި ގަވާއިދަށް ޓޫރިޒަމް ދާއިރާގެ ބޮޑެތި ބައެއް ވިޔަފާރިތަކުން ވަނީ ދެކޮޅު ހަދައިފަ އެވެ. އަދި އެ ގަވައިދުގައި ބުނާ ގޮތަށް އަމަލު ނުކުރެވޭނެ ކަމަށް ވެސް ވަނީ ބުނެފަ އެވެ. ނަމަވެސް، ރައީސް ޑރ. މުހައްމަދު މުއިއްޒު ވަނީ އެ ކަންބޮޑުވުންތައް ހުރި ނަމަވެސް ގަވައިދު ބަދަލުނުކުރައްވާނެ ކަމަށް މީގެ ކުރިން ފާޅުގައި ވިދާޅުވެފަ އެވެ.
ޑޮލަރު މާރުކުރަން ދެކޮޅު ހަދާ ކުންފުނިތަކުގެ ތެރޭގައި ރާއްޖޭގެ ޓޫރިޒަމް ދާއިރާގައި އެންމެ ބޮޑު ދެ ކުންފުނި ކަމަށްވާ ޗަމްޕާ ގުރޫޕާއި ޔުނިވާސަލް ގުރޫޕް ހިމެނެ އެވެ. މި ދެ ކުންފުނީގެ ވެރިންނަކީ ރާއްޖެއަށް ފަތުރުވެރިކަން ތައާރަފްކޮށް އެ ދާއިރާ ތަރައްގީކުރުމަށް އެންމެ ބޮޑަށް މަސައްކަތް ކުރެއްވި ބޭފުޅުންނެވެ.
އެބޭފުޅުންގެ ހިދުމަތް ބަލައިގަނެ ޝުކުރު އަދާކުރައްވަމުން ރައީސް މުއިއްޒު އެ ބޭފުޅުންނަށް އިލްތިމާސް ކުރެއްވީ ސަރުކާރާ ދެކޮޅަށް މަސައްކަތް ކުރައްވާ ސިޔާސީ ބޭފުޅުން، އެފަދަ ހިދުމަތްތެރިންގެ ފަރާތުން ނާޖާއިޒު ފައިދާ ނަގަން ފުރުސަތު ނުދެއްވާ ރައްޔިތުންގެ ފަޅިއަށް އެރުމަށް އެދިވަޑައިގެންފަ އެވެ.
އިތުރަށް ކިޔާލަން: ގަވާއިދު ބަދަލު ކުރެވޭކަށް ނެތް، 500 ޑޮލަރު ޖެހޭނީ މާރުކުރަން: ރައީސް
