ލިވަޕޫލްގެ ފޯވާޑްގެ ކޮންޓްރެކްޓް ހަމަވާން ކައިރިވެފައިވާއިރު، ކޮންޓްރެކްޓް އިތުރު ކުރަން އެއްވެސް މަސައްކަތެއް ކޮޅެއްގައި ޖެހޭތަނެއް ނުފެނެއެވެ އެހެން އެކަން އޮއްވާ ރިޕޯޓްތައް މިހާރު ބުނަނީ ސަލާހް ބޭނުންވަނީ ސައުދީ ޕްރޯ ލީގަށް ބަދަލުވާން ކަމަށެވެ.
ސަލާހްގެ ހުވަފެނަކީ ސައުދީއަށް ބަދަލުވުން ކަމަށް އަޑު އަރާފައިވާއިރު، ކޮންމެ އަގެއް ދައްކަން ޖެހުނު ނަމަވެސް އެ އަގެއް ދައްކައިގެން ސަލާހް ގެންދަން ސައުދީ އަރަބިއްޔާގެ އަލްހިލާލުން އޮތީ ތައްޔާރަށް ކަމަށް އަޑުތައްވަނީ ފެތުރިފައެވެ.
ރިޕޯޓްތައް ބުނާ ގޮތުން ސައުދީ އަރަބިއްޔާގެ ޗެމްޕިއަން އަލް ހިލާލް ބޭނުންވަނީ އަންނަ ހޫނު މޫސުމުގެ ކްލަބް ވޯލްޑް ކަޕުގެ ކުރިން، ލިވަޕޫލްގެ ތަރި މުހައްމަދު ސަލާހް އެ ކްލަބަށް ގެނައުމަށެވެ. އުމުރުން 31 އަހަރުގެ ސަލާހުގެ ކޮންޓްރެކްޓް މި ސީޒަން ނިމޭއިރު ނިމުމަކަށް އަންނައިރު، ކޮންމެ އަގެއްގައި ނަމަވެސް އޭނާ ގެންދަން އަލް ހިލާލުން ބޭނުންވާ ކަމަށް ރިޕޯޓްތައް ބުނެއެވެ.
ސަލާހަށް ސައުދީ ލީގުގެ ކަޅި އަމާޒުވެފައިވާއިރު، ސައުދީ ލީގުގެ އަލް އިއްތިހާދުން މީގެ ކުރިން ހުށަހެޅި 150 މިލިއަން ޕައުންޑްގެ ބިޑެއް ލިވަޕޫލުންވަނީ ރިޖެކްޓްކޮށްފައެވެ. އެކަމަކު މި ސީޒަންގެ ނިޔަލަށް ސަލާހްގެ ކޮންޓްރެކްޓް ހަމަވާތީ، ކްލަބަށް މިހާރުދެން އެކަމުގައި ކުރެވޭނެ މާބޮޑު ކަމެއްނެތެވެ. އާ ކޮންޓްރެކްޓެއްގައި ސޮއިކުރަން ސަލާހް ބޭނުންނުވާ ކަމަށް ރިޕޯޓްތައް ބުނެއެވެ.
