ފިނޭންސް މިނިސްޓްރީން ބުނީ އަސާސީ ޕެންޝަން ނިޒާމުގެ އިތުރުން ވަކިވަކި މުއައްސަސާތަކުން ހިންގާ ޕެންޝަން ސްކީމްތަކުގެ ދަށުން ގަނޑުކޮށް އަދި ހިދުމަތުގެ މުއްދަތަށް ބަލައިގެން މަހުން މަހަށް މުޅި އުމުރަށް ފައިސާ ދިނުމަކީ "ޑަބަލް ޕެންޝަން" ދިނުން ކަމަށެވެ.
މިހާރު ސަރުކާރުގެ 13 މުއައްސަސާއަކުން އަމިއްލަ ޕެންޝަން ސްކީމްތައް ހިންގާ އިރު، އަހަރުން އަހަރަށް އެ ސްކީމްތަކަށް ކުރާ ހޭދަ ދަނީ އިތުރުވަމުންނެވެ. މި އަހަރު އެ ސްކީމްތަކަށް 266 މިލިއަން ރުފިޔާ ހޭދަކުރާ އިރު، އަންނަ އަހަރު 272 މިލިއަން ރުފިޔާ ހޭދަވާނެ ކަމަށް ބަޖެޓުގައި ލަފާކޮށްފައިވެ އެވެ.
ފިނޭންސް މިނިސްޓްރީން ބުނީ ދައުލަތުގެ ބަޖެޓުން މުވައްޒަފުންގެ ކޮންޓްރިބިއުޝަނެއް ނެތި ހިންގާ ސްކީމަކީ އިންސާފުވެރި ނިޒާމެއް ނޫން ކަމަށާއި އެހެން ރައްޔިތުންނަށް ނުލިބޭ މަންފާތަކެއް ލިބޭގޮތަށް ބައްޓަން ކޮށްފައިވާ ނިޒާމެއް ކަމަށެވެ.
މި ބަދަލުތައް ގެންނަން ނިންމީ ނޭޝަނަލް ޕޭ ކޮމިޝަންގެ ރައީސް އަދި ފިނޭންސް މިނިސްޓަރު މޫސާ ޒަމީރެވެ. އަދި މި ބަދަލުތައް އަންނަ އަހަރުގެ ޖެނުއަރީ މަހުން ފެށިގެން ގެންނާނެ ކަމަށް އިދާރާތަކަށް އަންގައިފި އެވެ.
