އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ދައުލަތުގެ މީޑިއާ މެދުވެރިކުރައްވައި ވާހަކަދައްކަވަމުން ވިދާޅުވި ގޮތުގައި މި މަޝްރޫއުތައް ކުރިއަށް ގެންދިއުމަށް ބޭރުގެ ތިން ކުންފުންޏަކާ އެކު ފްރޭމްވޯކް އެއްބަސްވުމުގައި ސޮއިކޮށްފައިވެ އެވެ. އޭގެ ތެރޭގައި ސްރީލަންކާގެ ކުންފުންޏަކާ އެކު 3،000 ގެ އިމާރާތްކުރުމަށް ސޮއިކޮށްފައިވާ އިރު އިތުރު ދެ ކުންފުންޏަކާ އެކު 10،000 ގެ އިމާރާތްކުރުމަށް ސޮއިކޮށްފައިވެ އެވެ.
ހަމްދާން ވިދާޅުވި ގޮތުގައި މި މަޝްރޫއުތައް ކުރިއަށް ގެންދާނީ ބޭރުގެ އެކި ފައިނޭންސް އެޖެންސީތަކުން ލޯނު ނަގައިގެންނެވެ. އަދި ދެ މަސް ދުވަހުގެ ތެރޭގައި މި މަޝްރޫއުތައް ކުރިއަށް ގެންދިއުމުގެ ހުއްދައަށް އެދި ސަރުކާރަށް ހުށަހަޅާނެ ކަމަށާއި ކުރިއަށް އޮތް ހަތަރު މަސް ދުވަހުގެ ތެރޭގައި މަޝްރޫއުތައް ފަށާނެ ކަމަށް އޭނާ ވިދާޅުވި އެވެ.
މިހާރު އެފްޑީސީން ކުރިއަށް ގެންދަނީ ހުޅުމާލޭގެ ދެވަނަ ފިޔަވަހީގައި 4،000 ގެ އިމާރާތްކުރުމުގެ މަޝްރޫއެވެ. މި މަޝްރޫއު އަންނަ އަހަރުގެ ތެރޭގައި ނިންމުމަށް ވަނީ އަމާޒު ހިފާފަ އެވެ.
