
މި މަޝްރޫއުގެ ފީސިބިލިޓީ ދިރާސާ ހެދުމަށް ގްރީސްގެ ކޮންސަލްޓެންޓެއް ވަނީ ހަމަޖައްސާފަ އެވެ.
އެމްޕީއެލްގެ ރިސާޗް އެންޑް ޑިވެލޮޕްމަންޓް ކޮންސަލްޓެންޓް އަނިލް އާދަމް ދައުލަތުގެ މީޑިއާ މެދުވެރިކުރައްވައި މިކަން ހާމަކުރައްވަމުން ވިދާޅުވީ މި މަޝްރޫއުގެ ފީސިބިލިޓީ ދިރާސާ މި އަންނަ އަހަރުގެ ޖެނުއަރީ މަހު ނިންމާލުމަށް ފަހު، ފުރަތަމަ ކުއާޓާގައި އަމަލީ މަސައްކަތް ފެށޭނެ ކަމަށެވެ.
ކްރޫޒް ޓާމިނަލްތައް އަޅަން ނިންމާފައި ވަނީ ހއ. އުލިގަމާއި ލ. ފޮނަދޫ އަދި އައްޑޫ ސިޓީ ހިތަދޫގަ އެވެ. އަދި މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމަށް ފަހު، އެ ސަރަހައްދުގައި ވެސް ކްރޫޒް ޓާމިނަލެއް އެޅުމަށް ވަނީ ނިންމާފަ އެވެ.
އެމްޕީއެލްއިން ބުނީ މި މަޝްރޫއު ކުރިއަށް ގެންދާނީ ފަންނީ މީހުންގެ މަޝްވަރާގެ މަތިން ކަމަށާއި، އިމާރާތް ކުރުމާއި ބިނާވެށި ބެހޭ މިނިސްޓްރީއާ އެކު މަޝްވަރާތައް ކުރަމުންދާ ކަމަށެވެ. އަދި ހއ. އުލިގަމުގައި ކްރޫޒް ޓާމިނަލް އެޅުމަށް އެ ރަށު ކައުންސިލާ އެކު އެއްބަސްވުމެއްގައި ވެސް ވަނީ ސޮއިކޮށްފަ އެވެ.