މަޖިލީހުގެ މީޑިއާ ގްރޫޕުގައި ނޫސްވެރިން ކުރި ސުވާލުތަކަށް ޖަވާބު ދެމުން މަޖިލީހުގެ އޮފިޝަލަކު ބުނީ ދެން ޖަލްސާއެއް އޮންނާނީ އަންނަ ހަފުތާގެ ހޯމަ ދުވަހު ކަމަށެވެ. ނަމަވެސް މިއަދުގެ ޖަލްސާ ކެންސަލްކުރި ސަބަބެއް އަދި ހާމަކޮށްފައެއް ނުވެ އެވެ.
އިއްޔެގެ ޖަލްސާ ނިންމާލަމުން މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެފައިވަނީ މިއަދު ޖަލްސާއެއް އޮންނާނެ ކަމަށެވެ. މިކަމާ ގުޅިގެން މަޖިލީހުގެ އިދާރާއިން ބުނީ ޖަލްސާ ކެންސަލްކުރި ސަބަބު ސާފުކުރަން ޖެހޭނެ ކަމަށެވެ.
މަޖިލީހުގެ ސުޕަ މެޖޯރިޓީ އޮތް ޕީއެންސީން މި ދައުރު މި މަހުގެ 15 އާ ހަމައަށް ދަންމާލާފައިވަނީ ކުރަން ހުރި ބައެއް މަސައްކަތްތައް ނިންމާލުމަށް ކަމަށް ބުނެ އެވެ. މި ހުށަހެޅުން މަޖިލީހުގެ ތަޅުމަށް ހުށަހެޅުއްވީ މަޖިލީހުގެ ރައީސް އަބްދުއްރަހީމް އަބްދުﷲ އެވެ.
މިހާރު މަޖިލީހުގައި މަސައްކަތް ކުރަމުންދާ ބިލުތަކުގެ ތެރޭގައި މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލާއި ބަންޑާރަނައިބުގެ އޮފީހުގެ ބިލާއި ދިވެހިރާއްޖޭގެ ކުޅިވަރުގެ ގާނޫނަށް އިސްލާހު ގެނައުމުގެ ބިލު ހިމެނެ އެވެ.
