މިނިސްޓަރު އަމީން ވިދާޅުވީ މި އަހަރު ނިމުމުގެ ކުރިން އެއަބަސް އޭ330-200 ގެ ވައިޑް-ބޮޑީ މަތިންދާބޯޓެއް ރާއްޖެ ގެނެސް، އަންނަ އަހަރުގެ ޖެނުއަރީ މަހު އޮޕަރޭޝަން ފަށާނެ ކަމަށެވެ. އަދި އަންނަ އަހަރުގެ މެދަކު އިތުރު ވައިޑް-ބޮޑީ މަތިންދާބޯޓެއް ގެނައުމަށް ވަނީ ހަމަޖެހިފަ އެވެ.
ރާއްޖެ ގެންނަ ފުރަތަމަ ވައިޑް-ބޮޑީ މަތިންދާބޯޓުގައި 264 ގޮނޑި ހުންނާނެ އެވެ. އެއީ ބިޒްނަސް ކްލާސް އާއި ޕްރިމިއަމް އިކޮނޮމީ ކްލާސް އަދި އިކޮނޮމީ ކްލާސް އެވެ. މި މަތިންދާބޯޓުން އެންމެ ފުރަތަމަ ދަތުރުތައް ފަށާނީ ޗައިނާއަށެވެ. އޭގެ ފަހުން ޔޫރަޕާއި ސައުތު އެފްރިކާގެ ގައުމުތަކަށް ދަތުރުތައް ފެށުމަށް ވަނީ ރޭވިފަ އެވެ.
ދައުލަތުގެ މީޑިއާ މެދުވެރިކުރައްވައި ރައްޔިތުންނާ ވާހަކަ ދައްކަވަމުން، މިނިސްޓަރު އަމީން ވިދާޅުވީ މޯލްޑިވިއަންއަކީ ފައިދާ ލިބޭ އެއަލައިނަކަށް ހެދުމަށް ސަރުކާރުން އިސްކަން ދޭ ކަމަށާއި، މިހާރު ވެސް އެ އެއަލައިންއަށް ވަމުން އައި ގެއްލުން ވަނީ ކުޑަކުރެވިފަ އެވެ. އަދި ރާއްޖޭގެ ޓޫރިޒަމްގައި މުހިންމު ދައުރެއް އަދާކުރާ އެއަލައިނަކަށް ހެދުމަށް މަސައްކަތް ކުރަމުންދާ ކަމަށް ވެސް އެ މިނިސްޓަރު ވިދާޅުވި އެވެ.
