މާލޭގައި، މަންމައަށް އަނިޔާކޮށް ފައިސާ ހޯދަން އުޅެގެން މިދިޔަ ހަފްތާގައި ހައްޔަރު ކުރީ އުމުރުން 40 އަހަރުގެ ބޮޑު ދިވެހި ފިރިހެނެކެވެ. އޭނާގެ ބަންދު މުއްދަތު ހަމަވެގެން އަނެއްކާވެސް ކޯޓަށް ހާޒިރު ކުރުމުން އިތުރު އަށް ދުވަހަށް ބަންދުވަނީ އިތުރުކޮށްފަ އެވެ.
މާލޭގައި ހިނގި މި ހާދިސާއާ ގުޅިގެން އެ މީހާ ހައްޔަރުކޮށް ކޯޓަށް ހާޒިރުކުރުމުން، ފުރަތަމަ ފަހަރުވަނީ ހަފްތާއަކަށް އޭނާ ބަންދުކޮށްފައި ބެހެއްޓުމަށް ކޯޓުން އަމުރުކޮށްފައެވެ. ދެވަނަ އަމުރު ޖެހީ މިއަދު އެވެ.
މަންމައަށް އަނިޔާކޮށް ބިރު ދައްކައިގެން ފައިސާ ހޯދަން އުޅުނު މީހާގެ މައްޗަށް ޝަރުއީ ކޯޓެއްގެ އަމުރާއި ހިލާފުވުމުގެ ތުހުމަތު ކުރާއިރު އެ މީހާގެ މައްޗަށް، ގެވެށި އަނިޔާއިން ރައްކާތެރިކުރުމުގެ އަމުރެއް ފެމިލީ ކޯޓުންވަނީ ކުރިން ނެރެފައިވާ ކަމަށްވަނީ މައުލޫމާތު ލިބިފަ އެވެ.
މި މީހާގެ ބަންދު އަމުރު ރިޕޯޓުން އެނގޭ ގޮތުގައި އޭނާވަނީ އޭނާގެ މަންމައަށް ބިރު ދައްކައި، މަންމަގައިގައި ޖަހައި މާރާމާރީ ހިންގައި ގަދަކަމުން ފައިސާ ހޯދަން އުޅެފައެވެ. އޭނާ ބަންދުކޮށްފައިވަނީ މުޖުތަމައުގެ ސަލާމަތާ ރައްކާތެރިކަމަށެވެ.
