އެންސީއޭއިން ބުނީ އޮފީސްތަކުގެ ޓެލް ޑްރާމާ މުބާރާތް ބާއްވަނީ މުނިފޫހިފިލުވުމުގެ ދާއިރާއަށް ފަންނާނުން އިތުރުކޮށް، ފަންނުވެރީންނަށް ހިތްވަރުދީ، އަގުވަޒަންކޮށް، އެކުވެރި ވާދަވެރި މަހައުލެއްގައި ފަންނުވެރިކަން ތަރައްޤީކޮށް ދެމެހެއްޓުމުގެ މަޤްސަދުގައިކަމަށެވެ.
އެންސީއޭއިން ބުނީ މި ފަހަރުގެ މުބާރާތް ހުުޅުވާލާފައިވަނީ މުޅި ރާއްޖެއަށް ކަމަށެވެ. މިމުބާރާތުގައި ބައިވެރިވެވޭނީ ސަރުކާރު އޮފީސްތަކާއި މިނިވަން މުވައްސަސާތަކާއި ސަރުކާރު ހިއްސާވާ ކުންފުނިތަކުގެ އިތުރުން ރަށު ކައުންސިލް، އަތޮޅު ކައުންސިލް އަދި ސިޓީ ކައުންސިލްތަކަށްކަމަށް އެންސީއޭއިން ބުނެއެވެ.
އޮފީސްތަކުގެ ޓެލެ ޑްރާމާ މުބާރާތުގައި ބައިވެރިވުމުގެ ފުރުސަަތު ހުޅުވާލާފައިވަނީ މިމަހުގެ 12ގެ ނިޔަލަށެވެ. މިމުބާރާތުގައި ބައިވެރިވުމަށް އެދޭ ފޯމް އެންސީއޭގެ ވެބްސައިޓުން ޑައުންލޯޑް ކުރެވޭނެކަަމަށް އެތަނު ބުނެއެވެ.
އެން.ސީ.އޭ އޮފީސްތަކުގެ ޓެލެޑްރާމާ މުބާރާތުގެ އުސޫލުތަކަށް ބަދަލުގެންނަން ޖެހޭކަން މައުލޫމާތާއި ފަންނާ ބެހޭ ވަޒީރު އިބްރާހިމް ވަހީދު ވނީ ވިދާޅުވެފައެވެ. އެގޮތުން ޑްރާމާތައް އޮލިމްޕަހުގައި ސްކްރީންކޮށް، ޓިކެޓު ވިއްކައިގެން ލިބޭ އާމްދަނީގެ ޕަސެންޓޭޖެއް ޑްރާމާ އުފައްދާ ފަރާތްތަކަށް ލިބޭނެ އިންތިޒާމު ހަމަޖައްސައިދެއްވުމަށް މަސައްކަތް ކުރައްވާނެކަމަށް ވަޒީރު ވިދާޅުވިއެވެ.
