އާސަންދައިން ބުނީ ކުރިން އެ ސްކީމުން ކަވަކުރަމުން އައި ހުރިހާ ބޭހެއް މިހާރުވެސް ކަވަކުރަމުންދާ ކަމަށެވެ. އަދި ސްކީމުން ކަވަކުރާ ބޭސްތަކާއި އެ ބޭސްތަކަށް ކަވަކުރާ މިންވަރު އާސަންދަ ވެބްސައިޓުން ފެންނަން ހުންނާނެ ކަމަށް ވެސް ބުނެފި އެވެ.
އާސަންދައިން އިތުރަށް ބުނީ އެ ސްކީމުން ކަވަނުކުރާ ހިދުމަތަކާ ގުޅިގެން ދޭ ބޭހެއް ނަމަ "ނޮޓް ކަވަޑް" ބޭސް ސިޓީގައި ލިޔެފައި އޮންނާނެ ކަމަށެވެ. އަދި ސްކީމުން ކަވަކުރާ ބޭހެއް، ސްކީމުގެ ދަށުން ހިދުމަތް ފޯރުކޮށްދޭ ބޭސްފިހާރައަކުން ގަންނަން ޖެހިއްޖެ ނަމަ، އެކަން ޝިކާވަތި ޗެޓްލައިނަށް ރިޕޯޓުކުރެވޭނެ ކަމަށް ވެސް ބުނެފި އެވެ.
މި ބަދަލުތައް މި ގެންނަނީ އާސަންދަ ނިޒާމަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތްތަކެއް ފޯރުކޮށްދޭ ނިޒާމަކަށް ހެދުމަށް ޓަކައި ކަމަށް އެންސްޕާއިން ބުނެފައި ވެ އެވެ. އެގޮތުން އާސަންދަ ސްކީމުގެ ދަށުން އެންމެ ގިނައިން ދޫކުރާ 250 ބޭހުގެ އަގަށް ބަދަލު ގެނައުމަށް އެންސްޕާއިން ވަނީ ނިންމައިފަ އެވެ.
