އެމްޑީޕީން އިއްޔެ ހަވީރު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ޗެއާޕާސަން ފައްޔާޒު އިސްމާއީލް ވަނީ ރައްޔިތުންނަށް އަނިޔާވެރިވެއްޖެ ނަމަ އެ ރައްޔިތުން ވެސް އަނިޔާވެރިވާނެ ކަމަށް ވިދާޅުވެފަ އެވެ. އަދި އެކަމުގައި ތާރީހުގެ ފޮތްތަކަށް ބަލާނެ ކަމަށް ވެސް އޭނާ ވިދާޅުވި އެވެ.
އޭގެ ކުރިން ކުޅުދުއްފުށި ސިޓީގައި އެ ޕާޓީން ބޭއްވި ޖަލްސާއެއްގައި ވެސް ވާހަކަ ދެއްކި މީހަކު ވަނީ، ރައީސް އަމީންގެ ވެރިކަމުގެ ނިމުމާ މި ސަރުކާރާ ގުޅުވައި ވާހަކަ ދައްކައިފަ އެވެ.
މިކަންކަމާއި ގުޅިގެން ދެންމެ ޕީއެންސީން ނެރުުނު ބަޔާނެއްގައި ބުނީ ރައީސް އަމީނާމެދު ކަން ހިނގައިދިޔަ ގޮތަކީ ރާއްޖޭގެ ތާރީހުގެ އަނދިރި ސޮފުހާއެއް ކަމަށެވެ.
އަދި، މިއަދު ގާއިމްކުރެވިފައިވާ ދުސްތޫރީ ނިޒާމުގެ އެންމެ ބޮޑު ބޭނުމަކީ ސިޔާސީ ކަންކަމުގެ ތެރެއަށް އަނިޔާވެރިކަމާއި ހަމަނުޖެހުން ނުވައްދައި، ޑިމޮކްރެޓިކް ހަމަތަކުގެ މަތީން ކަންކަން ކުރިއަށް ގެންދިއުން ކަމަށް ޕީއެންސީން ބުންޏެވެ.
އެ މައްސަލައިގައި ވެރިކަން ކުރާ ޕީއެންސީގެ މެންބަރުން މިއަދު ރައްޔިތުންގެ މަޖިލީހުގައި ކަންބޮޑުވުން ފާޅުކޮށް، ކުއްލި މައްސަލައެއް ވެސް ހުށަހެޅި އެވެ.
މި ކުއްލި މައްސަލަ މަޖިލީހަށް ހުށަހެޅުއްވީ މިލަންދޫ ދާއިރާގެ ޕީއެންސީ މެންބަރު ހަސަން މުފީދު އަބްދުލްގާދިރު އެވެ. އެ މައްސަލައަށް ބަހުސްކުރައްވަމުން ސަރުކާރު ހިންގާ ޕީއެންސީގެ މެންބަރުންވެސް ގޮވައިލެއްވީ ފައްޔާޒު ހައްޔަރުކޮށް މައްސަލަ ތަހުގީގުކުރުމަށެވެ.
ގިނަ މެންބަރުން ވިދާޅުވި ގޮތުގައި އެމްޑީޕީން މަސައްކަތްކުރަނީ ގައުމުގެ ހަމަޖެހުން ނަގައިލާ މުޖުތަމައު ހަލަބޮލިކަމުގެ ތެރެއަށް ޣަރަގުކޮށްލުމަށެވެ.
އެމްޑީޕީންގެ ތެރެގައި މި ދެކެވުނު ވާހަކަތަކާއި ގުޅިގެން ހިޔާލުފާޅުކުރުމުގެ މިނިވަންކަމުގެ ތެރޭގައި ވިޔަސް، އަނިޔާވެރި އަމަލުތަކަށް ހިތްވަރު ދިނުމަކީ ބަލައިގަނެވޭނެ ކަމެއް ނޫން ކަމަށް ބުނެ ހިއުމަން ރައިޓްސް އޮފް ދަ މޯލްޑިވްސް (އެޗްއާރްސީއެމް)އިން ވަނީ ބަޔާނެއް ނެރެފަ އެވެ.
