މި ޕޯޓަލް އާއެކު ބީސީސީން ދެމުން އަންނަ ހިދުމަތްތައް ކަމަށްވާ، އޮތެންޓިކް މޯލްޑިވްސް، ސީޑް ބައި ބީސީސީ، ވިޔަފާރި ކޮންސަލްޓެންސީގެ ހިދުމަތް، މަހަ ޕޯޓަލް، އަދި ކްރިއޭޓިވް އިކޮނޮމީ ފަންޑާއި އަމިއްލަ މަސައްކަތް ކުރައްވާ ފަރާތްތަކުގެ ދަފްތަރުގައި ހިމެނުމުގެ ފުރުސަތުވެސް ލިބޭނެ ކަމަށް އެ ކޯޕޮރޭޝަނުން ބުނެއެވެ.
ކުމެވި ޕޯޓަލް އިފްތިތާހް ކުރުމަށް އިއްޔެ ބީސީސީގައި ބޭއްވުނު ރަސްމިއްޔާތެއްގައި އެ ޕޯޓަލް އިފްތިތާހް ކުރެވުނީ ބީސީސީގެ ފޭސްބުކް ޕޭޖު މެދުވެރިކޮށް ސުމޭކުކޮށެވެ.
އޮތެންޓިކް މޯލްޑިވްސްގެ ސަޕްލަޔަރަކަށް ވާންއެދޭ ފަރާތްތަކަށް އެކަމަށް އެދި ހުށަހެޅުމާއި، ސީޑް ބައި ބީސީސީންދޭ ހިދުމަތްތައް ކަމަށްވާ، މަސައްކަތު ޖާގަތައް ހޯދުމަށް އެދި ހުށަހެޅުމާއި، ވިޔަފާރި އެއް ފެށުމަށް ނުވަތަ ވިޔަފާރިއާ ބެހޭ ކަންކަމުގައި ތަޖުރިބާކާރުންގެ ހިޔާލާއި މަޝްވަރާ ހޯދުމަށްޓަކައި ކޮންސަލްޓެންސީގެ ހިދުމަތަށް އެދި ހުށަހެޅުމާއި، މަސްވެރި އުފެއްދުންތައް ވިއްކުމަށް ހާއްސަ މަހަ ޕޯޓަލްގެ ހިދުމަތްތައް ހޯދުމަށާއި، އަމިއްލަ މަސައްކަތް ކުރައްވާ ފަރާތްތަކުގެ ދަފްތަރުގައި ހިމެނުމުގެ އިތުރުން ބީސީސީން ދާދިފަހުން ފެށި ކްރިއޭޓިވް އިކޮނޮމީ ފަންޑުގެ ހިދުމަތް ހޯދުމަށްވެސް މީގެފަހުން ކުމެވި ޕޯޓަލް ބޭނުން ކުރެވޭނެ ކަމަށް އެ ކޯޕޮރޭޝަނުން މައުލޫމާތުދެއެވެ.
މީގެކުރިން މި ހިދުމަތްތަކަކީ ބީސީސީގެ ވެބްސައިޓުގައި ހިމެނިފައިވާ ވަކިވަކި ހިދުމަތްތަކެއް ނަމަވެސް ކުމެވި ޕޯޓަލްއާއެކު އީފާސް މެދުވެރިކޮށް ލޮގްއިން ވެގެން އެ ހުރިހާ ހިދުމަތެއްވެސް އެއް މަންސައަކުން ލިބޭނެ މަގު މިހާރު ފަހިވެފައިވާކަމަށް އެ ކުންފުނިން ފާހަގަކުރެއެވެ.
ބީސީސީގެ ވެބްސައިޓް www.bcc.mv އިން މިހާރު ކުމެވި ޕޯޓަލް ފެންނަން ހުންނާނެކަމަަށް ފާހަގަކުރެއެވެ. އަދި ބީސީސީން ކުދި އަދި މެދުފަންތީގެ ވިޔަފާރިތަކަށް ފަސޭހަކޮށްދިނުމުގެ މަގުސަދުގައި އިފްތިތާހްކުރި މި ޕޯޓަލްގެ މަސައްކަތަކީ ޔޫއެންޑީޕީ އާއި ޖަޕާން ސަރުކާރުގެ އެހީތެރިކަމާއެކު ކުރެވުނު މަސައްކަތެއްކަމަށްވެސް އެ ކޯޕޮރޭޝަނުން ފާހަގަކުރެއެވެ.
